“Dragon Oil” şirkəti Xəzər dənizinin Türkmənistan sektorundakı 19-cu blokda neft-qaz quyusunda kəşfiyyat işləri apardıqdan sonra gündəlik 20 min barel neft hasilatına nail olmaq məqsədi ilə yatağın sınaq mərhələsinə keçmək niyyətindədir.
Caspian Barrel Birləşmiş Ərəb Əmirliyinin WAM xəbər agentliyinə istinadən xəbəbr verir ki, bunu şirkətin baş icraçı direktoru Əli Rəşid Əl-Carvan bazar ertəsi Aşqabadda “Türkmennebit” konserninin Dövlət Neft Şirkətinin rəhbərliyi ilə keçirilən görüşdə bəyan edib.
“Dragon Oil” şirkətinin baş icraçı direktoru Əli Rəşid Əl Cərvan deyib: “Kəşfiyyatın birinci mərhələsi ilkin məlumat kimi ümumi sahəsi 3800 kvadrat kilometr olan Blok 19-da neft və qaz quyusunda karbohidrogenlərin kəşfiyyatını əhatə edir. Blok zəngin geoloji ehtiyatlara malik ərazilərdə yerləşdiyinə görə böyük həcmdə karbohidrogenlərin mövcudluğundan xəbər verir”.
Əl-Carvan onu da əlavə edib ki, karbohidrogenlərin bolluğu ilə bağlı ilkin tədqiqatlardan müsbət nəticələr alınarsa, onlar yatağın kompleks inkişaf planını hazırlayacaqlar.
Bu ilin yanvarında “Türkmennebit” Dövlət Konserni və “Dragon Oil (Türkmənistan) Ltd” şirkəti arasında Anlaşma Memorandumu imzalanıb, ona əsasən BƏƏ neft şirkəti “Çələkən” bloku yaxınlığında üç perspektivli yatağın işlənməsinə başlayacaq.
“Dragon Oil” 2000-ci ildən Hasilatın Pay Bölgüsü Sazişi əsasında Türkmənistanla neft və qaz sahəsində əməkdaşlıq edir. Şirkətin əsas fəaliyyəti Xəzər dənizində, xüsusən də “Çələkən” müqavilə sahəsində karbohidrogen ehtiyatlarının hasilatıdır.
