Beynəlxalq Enerji Agentliyinin (IEA) hesabatına əsasən, Avropanın yeraltı qaz anbarlarında hazırda toplanmış qaz ehtiyatları istilik mövsümündə 2019-2023-cü illərin pik qış səviyyələrindəki istehlakda olarsa, onda cəmi 65 gün üçün kifayət edər.
“Bizim hesablamalarımıza görə, bu qaz həcmi ötən qışda əldə olunmuş səviyyədə olarsa, onda 84 günlük istehlaka kifayət edəe”, – deyə agentlik bildirir.
Avropa İttifaqı (Aİ) ölkələri yeraltı qaz anbarlarındakı ehtiyatlardan istifadəyə noyabrın 7-də başlayıblar (ötən ilin payız-qış mövsümündən bir həftə tez). Bu il qaz anbarlarını Avropada rekord həddə – 99,63% (təxminən 110,3 milyard kubmetr) doldurmaqla istilik mövsümünə hazırlıq görülüb.
Aİ ölkələrinə mülayim payız havası, artan LNG (maye sıxılmış qaz) idxalı və ötən isitmə mövsümündən yeraltı qaz anbarlarında yüksək həcmdə qalıq ehtiyatların formalaşması hesabına öz mavi yanacaq ehtiyatlarını rekord səviyyəyə çatdırmağa kömək edib.
Avropa Komissiyası qeyd edib ki, qaz anbarları Avropada qaz təchizatının etibarlılığının təmin edilməsində əsas rol oynayır, çünki onlar qışda Aİ-nin tələbatının üçdə birinə qədərini ödəyə bilir.
“Gas Infrastructure Europe” (GIE) məlumatına görə, noyabrın 11-də Aİ ölkələrində yeraltı anbarlardan qaz götürülməsi 67 milyon kubmetr təşkil edib. Eyni zamanda, anbarlara vurulma həcmi 43 milyon kubmetr olub. Bu tarixə Avropada yeraltı qaz obyektlərində ehtiyatlar 109,64 milyard kubmetr (99,45% dolu olub), təşkil edib.
Avropanın yeraltı anbarlarından qazın götürülməsi mövsümü 2023-cü il aprelin 7-də başa çatmışdı, o zaman qalıq ehtiyatları 55,47% səviyyəsində idi.
Oktyabrda Avropada qazın orta satış qiyməti 1000 kubmetr üçün 513 dollar təşkil edib. Noyabrın ilk ongünlüyünün nəticələrinə görə isə qaz qiymətləri Avropada 518 dollar olub.
