Azərbaycan hökuməti 2024-cü ildə ölkədə qaz hasilatını 49 milyard 63,6 milyon kubmetr həcmində proqnozlaşdırır. Bu barədə “İnterfaks-Azərbaycan”a hökumətdəki mənbə məlumat verib.
2023-cü il ərzində ölkədə qaz hasilatı üzrə faktiki məlumatlar hələlik dərc olunmayıb. Lakin, ötən ilin oktyabr ayında energetika naziri Pərviz Şahbazov məlumat verib ki, 2023-cü ildə Azərbaycanda qaz hasilatı 48,7 milyard kubmetr səviyyəsində proqnozlaşdırılır.
Beləliklə, 2024-cü ildə qaz hasilatının artımı 2023-cü illə müqayisədə 0,7% təşkil edə bilər.
«2024-cü il üçün Azərbaycanda əmtəə qazının hasilatı 36 milyard 779,6 milyon kubmetr həcmində proqnozlaşdırılır», – mənbə qeyd edib.
Dövlət Statistika Komitəsinin məlumatına görə, 2023-cü ilin 11 ayı ərzində Azərbaycanda 44 milyard 221,1 milyon kubetr (artım 4,1%) qaz hasil olunub. Həmçinin, əmtəə qazının hasilatı 33 milyard 146,8 milyon kubmetr (artım 4,3%) təşkil edib.
2022-ci ildə Azərbaycanda 46 milyard 743,3 milyon kubmetr qaz (artım 6,6%) hasil edilib. Əmtəəlik qaz hasilatı 34 milyard 958,3 milyon kubmetr (artım 7,3%) təşkil edib.