Avropa Azərbaycandan neft məhsullarının idxalını fantastik dərəcədə artırıb

Və bu o zaman baş verir ki, Azərbaycan özü qonşu ölkələrdən neft məhsullarının idxalını artırır…

Avropa İttifaqı (Aİ) ölkələri 2023-cü ilin yanvar-iyul aylarında Azərbaycandan neft məhsullarının idxalını ildən ilə 286 dəfə – 201,928 min tona qədər artırıb.

Bu barədə “İnterfaks-Azərbaycan” agentliyi Aİ Statistika İdarəsinin (Avrostat) materiallarına istinadən xəbər verir.

İdxalın dəyəri 118,036 milyon avro (artım 146 dəfə) təşkil edib.

Yanvar-iyul aylarında Aİ ölkələri arasında Azərbaycandan neft məhsullarının ən iri idxalçılarının üçlüyünə Yunanıstan (64,93 milyon avro dəyərində (bir il əvvəl idxal həyata keçirilməyib) 128,448 min ton), Kipr (31,29 milyon avro dəyərində (bir il əvvəl idxal həyata keçirilməyib) 40,24 min ton) və Malta (14,877 milyon avro dəyərində (artım 381 dəfə) 24 min ton (artım 214,7 dəfə) daxil olub.

2023-cü ilin iyul ayında Aİ ölkələri Azərbaycandan 22,574 milyon avro dəyərində (artım 347 dəfə) 43,174 min ton neft məhsulları (ildən ilə artım 1053 dəfə) idxal edib. Hesabat ayında idxalın əsas hissəsi Yunanıstan (22,062 milyon avro dəyərində 42,615 min ton) payına düşüb.

Avrostatın məlumatına görə, 2022-ci ildə Aİ ölkələri Azərbaycandan neft məhsullarının idxalını 2021-ci illə müqayisədə 34,5% – 17,6 min tona qədər artırıb. Hesabat dövründə Aİ üzvləri bu məqsədlər üçün 15,189 milyon avro (il ərzində artım 2,3 dəfə) yönəldib.