Hazırda Avropanın 10-dan çox ölkəsinin Azərbaycan qazına olan ümümi tələbatı illik 30 milyard kubmetrdən çoxdur. “İnterfaks-Azərbaycan” agentliyinin məlumatına görə, bunu energetika naziri Pərviz Şahbazov deyib.
“Hazırda Avropanın 10-dan çox ölkəsinin Azərbaycan qazına olan ümümi tələbatı illik 30 milyard kubmetrdən çoxdur və bu layihələr əlavə tədarükün mühüm mənbələri qismindədir”, – deyə nazir bu gün rəsmi mətbuatda dərc olunmuş məqaləsində bildirib.
Onun sözlərinə görə, söhbət iyulda istismara verilən, indiyədək 453 milyon kubmetr qaz və 171 min ton kondensatın hasil edildiyi “Abşeron” yatağı, həmçinin işlənmədə olan “Qarabağ”, “Ümid” (Mərhələ-II), “Babək” və “Azəri-Çıraq-Günəşli” dərin qaz layihələrindən gedir.
Şahbazov vurğulayıb ki, enerji böhranı dövründə Azərbaycan Avropanın enerji təchizatını şaxələndirən ölkə, enerji təhlükəsizliyinin təminatında etibarlı strateji tərəfdaş oldu.
“2022-ci ildə Avropaya qaz tədarükü 40% artımla 11.4 milyard kubmetrə çatdırıldı. Ümumiyyətlə, TANAP və TAP istismara veriləndən indiyə kimi Türkiyə 24.3 milyard kubmetr, Avropa isə 28.7 milyard kubmetr Azərbaycan qazı ilə təchiz edilib”, – deyə energetika naziri qeyd edib.
Azərbaycan qazının TAP kəməri ilə İtaliya, Yunanıstan və Bolqarıstana tədarükünə 2020-ci il dekabrın 31-də, Rumıniyaya isə 2023-cü il yanvarın 1-dən başlanılıb. 2023-cü ilin sonunadək Macarıstana, 2024-cü ildə isə Serbiyaya qaz tədarükünə başlanılacaq.
Bundan başqa, Azərbaycan qazı Türkiyə (TANAP və Cənubi Qafqaz boru kəməri (CQBK) ilə) və Gürcüstana (CQBK və Qazıməmməd-Qazax qaz kəməri ilə) da ixrac edilir.
