Azərbaycan Respublikası Dövlət Neft Şirkətinin (SOCAR) Müşahidə Şurasının iclasında idarəetmə strukturunun təkmilləşdirilməsi, səmərəliliyinin daha da yüksəldilməsi məqsədilə SOCAR-ın yeni əməliyyat modeli təsdiq olunub.
Bununla bağlı SOCAR-ın mətbuat xidmətinin iyulun 27-də açıqladığı məlumatda bildirilir.
Məlumata əsasən, SOCAR-ın Müşahidə Şurasının sədri, iqtisadiyyat naziri Mikayıl Cabbarovun sədrliyi ilə keçirilən iclasda SOCAR-ın 2022-ci il büdcəsinin icrası və maliyyə-təsərrüfat fəaliyyəti barədə müzakirə aparılıb, ötən il şirkətin maliyyə göstəricilərinin əhəmiyyətli dərəcədə artdığı vurğulanıb.
Müşahidə Şurasının iclasında, həmçinin şirkətin 2023-cü ilin yarımillik fəaliyyəti üzrə nəticələr nəzərdən keçirilib, 2024-cü il və sonrakı 3 il üçün büdcə proqnozları və gündəlikdə duran məsələlər ətrafında fikir mübadiləsi aparılıb.
Bu xüsusda, xam neft və qaz kəşfiyyatı və hasilatı sahəsində effektivliyin artırılması, şirkətin “yaşıl enerji” istehsalında fəaliyyətinin gücləndirilməsi, innovativ və rəqəmsal texnologiyaların tətbiqi, biznes dayanıqlılığının və insan kapitalının inkişaf etdirilməsi istiqamətlərində görülən işlər və gələcək hədəflər barədə müzakirə aparılıb.
Yeni əməliyyat modeli nədir?
Caspian Barrel bununla əlaqədar Wikipedia-da əks edilmiş materialı təqdim edir: Əməliyyat modeli bir şirkətin daxili və xarici müştərilərinə necə dəyər verdiyinin vizual təsviridir. Dəyər zənciri xəritələri (value chain map) kimi də tanınan əməliyyat modelləri işçilərə şirkətin hər bir hissəsinin digər departamentlərin və strukturların ehtiyaclarını ödəməkdə oynadığı rolu vizuallaşdırmağa və başa düşməyə kömək etmək üçün yaradılır.
Əməliyyat modellərinə maraq və diqqət həm də şirkətin gündəlik fəaliyyətini başa düşmək və onun təkmilləşdirilməsi variantlarını təklif etmək istəyi ilə əlaqələndirilir.
SOCAR-ın Müşahidə Şurası haqda
Caspian Barrel xatırladır ki, SOCAR-ın Müşahidə Şurası Azərbaycan Respublikası Prezidentinin 2021-ci il 23 yanvar tarixli 1258 №-li Fərmanı ilə yaradılıb.
SOCAR-ın Müşahidə Şurasının sədrdən əlavə 6 üzvü var:
Anar Axundov – Azərbaycan Respublikası İqtisadiyyat nazirinin müşaviri;
Azər Bayramov – Azərbaycan Respublikası Maliyyə nazirinin müavini;
Emin Hüseynov – Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi;
Elnur Soltanov – Azərbaycan Respublikası Energetika nazirinin müavini;
İsrafil Məmmədov – Azərbaycan Respublikası Dövlət Neft Fondunun İcraçı direktoru;
Ruslan Əlixanov – Azərbaycan İnvestisiya Holdinqinin Baş icraçı direktoru.
Azərbaycan Respublikası Prezidentinin 2021-ci il 23 yanvar tarixli 1258 №-li Fərmanına əsasən, SOCAR-ın Müşahidə Şurasının səlahiyyətləri aşağıdakılardır:
1. SOCAR-ın uzunmüddətli inkişaf strategiyasını təsdiq etmək;
2. SOCAR-ın xərclər və gəlirlər smetasını təsdiq etmək və onun icrasına nəzarəti həyata keçirmək;
3. SOCAR-ın xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), eləcə də müstəqil auditorun rəyi ilə aidiyyəti şəxslə dəyəri SOCAR-ın aktivlərinin 5 (beş) faizini və daha çox hissəsini təşkil edən əqdin bağlanması ilə bağlı ümumi yığıncağa təkliflər vermək;
4. aidiyyəti şəxslərlə bağlanması nəzərdə tutulan və dəyəri SOCAR-ın aktivlərinin 5 (beş) faizinədək hissəsini təşkil edən əqdləri təsdiq etmək;
5. mövcud normativ hüquqi aktların tələbləri nəzərə alınmaqla SOCAR-ın aktivlərinin idarəetməyə verilməsi və özəlləşdirilməsi ilə bağlı əqdlərin bağlanmasına razılıq vermək;
6. fəaliyyətinin ayrı-ayrı sahələri üzrə siyasəti, daxili qaydaları, habelə filial və nümayəndəliklərinin əsasnamələrini təsdiq etmək;
7. SOCAR-ın korporativ strukturunun və ştat cədvəlinin təsdiq edilməsinə razılıq vermək;
8. SOCAR-ın Audit Komitəsini və digər komitələrini yaratmaq, onların əsasnamələrini təsdiq etmək, rəhbərlərini və üzvlərini vəzifəyə təyin və vəzifədən azad etmək.
