TPAO şirkəti “Sakarya” qazının ilk fazası üçün $1,8 mlrd xərcləyib

Türkiyə Qara dəniz qazının Avropa bazarlarına çıxması üçün mövcud iqtisadi şəraitdə yaxşı potensial görür, deyə
Türk Petrolları Anonim Ortaqlığı (TPAO) şirkətinin idarə heyətinin sədri və baş icraçı direktoru Melih Han Bilgin bəyan edib.

2020-ci ildə Qara dənizin Türkiyə hissəsində qaz yatağı aşkar edilib və onun həcmi 540 milyard kubmetr qiymətləndirilir. Daha sonra Türkiyə prezidenti Rəcəb Tayyib Ərdoğan “Sakarya” adlandırılan yatağı ölkənin ən böyük qaz xəzinəsi adlandırdı. O, Qara dənizdə həmçinin həcmi 58 milyard kubmetr olan daha bir yatağın kəşf edildiyini və ümumi qaz ehtiyatlarının 710 milyard kubmetrə çatdığını açıqladı.

Parlamentdə çıxış edən Rəcəb Tayyib Ərdoğan bildirib ki, Türkiyə Qara dəniz şelfində hasil edəcəyi qaz Ramazan bayramının başlanğıcı zamanı – aprelin 20-də milli paylama sisteminə axmağa başlayacaq.

“Sahədə hasil edilən qazın bir hissəsi ixrac ediləcək” deyən TPAO rəhbəri Bilgin onu da əlavə edib ki, Türkiyə qazında Avropa bazarı üçün yaxşı potensial görür.

“Mövcud bazar şərtlərində, düşünürəm ki, biz müştərilər tapmaqda çətinlik çəkməyəcəyik”, deyə TPAO rəhbəri “The Financial Times” qəzetinə açıqlamasında bəyan edib.

Onun sözlərinə görə, “Sakarya” yatağında hasil ediləcək qaz layihəsinin birinci mərhələsinə 1,8 milyard dollar xərcləyən şirkət yaxın illərdə hasilatı artırmağı planlaşdırır.

Bilgin, Qara dəniz qaz emalı zavodunun tam gücü ilə işlədiyi zaman hasilatın gündəlik olaraq 40 milyon kubmetrə çatacağına ümid etdiyini bildirib. O, sonrakı mərhələlərin nə qədər başa gələcəyi ilə bağlı şərh verməkdən imtina edib, lakin qazın “keçid yanacağı” hesab edildiyi üçün TPAO-nun lazımi maliyyə ilə təmin edə biləcəyinə əminliyini ifadə edib.

“Sakarya” strukturu üzrə kəşfiyyat işləri 2017-ci ildə başlayıb. 21 avqust 2020-ci ildə “Fatih” gəmisindən aparılan qazma əməliyyatları nəticəsində sahildən 155 km məsafədə qaz yatağı açılıb.

13 iyun 2022-ci ildə yataqdan sahilə doğru sualtı kəmərin tikintisi başlayıb və həmin ilin sonunda tam istifadəyə verilib. Hasilatın ilk ilində 3,5-4 milyard kubmetr qazın alınması planlaşdırılır, sonradan hasilatın mərhələli şəkildə artırılması ilə illik hasilatın 14,5-15 mlrd kubmetrədək çatdırılması proqnoz edilir.

Caspian Barrel