Səudiyyə Ərəbistanı da daxil olmaqla daha 8 OPEC+ ölkələrinin hasilatı may ayından etibarən gündəlik 1,66 milyon barel azaltmaq qərarından sonra neft qiymətləri hərraclarda yüksək artım nümayiş etdirir.
Bu gün Bakı vaxtı ilə saat 11:20-yə olan məlumata görə, Londonun ICE Futures birjasında Brent markalı neftin iyun fyuçersləri 0,39 dollar (0,46%) artaraq 85,45 dollar/barelə bərabər olub. Bazar ertəsi Brent nefti 5,04 dollar (6,3%) bahalaşaraq 84,93 dollar/barelə çatıb.
Dow Jones məlumatlarına görə, bazar ertəsi Brent-in dəyərindəki artım 21 mart 2022-ci ildən, WTI-dan bəri – keçən ilin 12 aprelindən bəri ən yüksək artım olub.
Aprelin 2-də OPEC+-a daxil olan 23 ölkədən 9-u keçən ilin oktyabrında keçirilən iclasda neft hasilatını tənzimləmək üzrə öhdəliklərə əlavə olaraq, may ayından ilin sonuna qədər könüllü hasilatı azaltdığını elan edib.
OPEC+ monitorinq komitəsinin bazar ertəsi keçirilən iclasının yekunlarına əsasən, OPEC+ ölkələrinin əlavə könüllü hasilat düzəlişləri ümumilikdə 1,66 milyon barel/gün təşkil edəcək.
“Bloomberg” agentliyi qeyd edir ki, bir sıra OPEC+ ölkələrinin gözlənilməz qərarı bir sıra ekspertlər tərəfindən neft qiymətləri ilə bağlı proqnozlara yenidən baxılmasına və inflyasiya ilə bağlı yeni narahatlıq dalğasına səbəb olub.
“Goldman Sachs” bankı analitikləri 2023-cü ilin dekabrı üçün Brent markalı neftin qiyməti proqnozunu 90 dollardan 95 dollara, 2024-cü ilin dekabrına isə bir barel üçün 95 dollardan 100 dollara qədər artırıblar.
Enerji bazarları üzrə ixtisaslaşan “Rystad Energy” konsaltinq şirkətinin ekspertləri etiraf edirlər ki, bu yay Brent neftinin qiyməti bir barel üçün 110 dollara qədər yüksələ bilər.
Caspian Barrel
