Hərbi münaqişə regionda sabitliyi poza bilər, lakin ekspertlər qeyd edirlər ki, bu cür hadisələr, bir qayda olaraq, neft bazarına yalnız qısamüddətli təsir göstərir.
Neft qiymətləri yeni həftənin əvvəlində kəskin yüksəldi. Londonun “ICE Futures” əmtəə birjasında Brent markalı neftin dekabr fyuçerslərinin qiyməti 5,2% artaraq pik həddində bir barel üçün 88,99 dollara satılıb. Ticarət məlumatları göstərir ki, Bakı vaxtı ilə saat 10:23-də artım 3,48%-ə qədər azalıb və neft müqavilələri bir barel üçün 87,59 dollara başa gəlib.
Beləliklə, neft qiymətləri ötən həftənin itkilərinin bir hissəsini bərpa edib: bu dövrdə Brent markalı neft 11,3% ucuzlaşmışdı ki, bu da qiymətlərin cari ilin martından bəri ən əhəmiyyətli azalması idi.
“BCS World of Investments”-in ekspertləri qeyd ediblər ki, neftin qiymətinin dinamikasının dəyişməsinə səbəb Yaxın Şərqdə gözlənilmədən başlanan münaqişənin neft tədarükünə ola biləcək risklərin artımından qaynaqlanır.
Oktyabrın 7-də Qəzza zolağına nəzarət edən Fələstinin Həmas hərəkatı İsrailə qəfil hücum edərək “Əl-Əqsa tufanı” hərbi əməliyyatına başladığını elan edib. Raket hücumlarına paralel olaraq onlarla HƏMAS yaraqlısı yük maşınları, motosikletlər və paraplanlarla İsrail ərazisinə daxil olub. Onlar ölkənin cənubundakı Sderot şəhərində polis məntəqəsini ələ keçirib və İsrail hərbçilərini və sərhədyanı qəsəbələrin sakinlərini girov götürərək Qəzza zolağına aparıblar. İsrail buna cavab olaraq antiterror əməliyyatına başlayıb və Fələstin ərazisinə güclü hava zərbələri endirib.
1973-cü ilin oktyabrından bu yana İsraillə Fələstin arasında hələ bu masştabda hərbi toqquşma baş verməmişdi.
Caspian Barrel
