Caspian Barrel “Bloomberg” agentliyinə istinadən yazır ki, 2024-cü ildə qlobal neft donanmasına cəmi iki yeni tanker qoşulacaq ki, bu da təxminən 40 ildə ən kiçik göstəricidir.
Agentlik dünyadakı gəmi tərsanələrində olan sifarişləri təhlil edərək qeyd edir ki, 2025-ci ildə cəmi beş tanker istismara verilməlidir, baxmayaraq ki, 2022-ci ildə onların sayı 42 olmuşdu.
Gəmi çatışmazlığı problemi Qırmızı dənizdə gəmilərə hücumlar səbəbindən neft ticarətində fasilələr fonunda yenidən müzakirə edilib.
Materialda deyilir ki, Ukraynada hərbi əməliyyatlar başlayandan bəri, əvvəllər Baltik dənizi ilə cəmi bir-neçə günə Avropaya neft tədarükü həyata keçirilirdisə, indi bu proses həftələr çəkir (Rusiyadan Avropaya daşımalar həyata keçirilmir, boru ilə nəqletmə dayanıb, Rusiya nefti əsasən Asiya və Uzaq Şərq bazarlarına daha uzun yollarla çıxarılır, bu səbəbdən də tankerlər daha çox yolda olurlar və tankerlərə tələbat artdığından qiymət də artır) və Qırmızı dənizdəki hadisələr daşıma müddətini daha da artırır.
Hüsilər 2023-cü ilin noyabr ayının sonlarından ticarət gəmilərinə hücumlara başladıqdan bir müddət sonra Qırmızı dənizdən yan keçməklə yeni marşrutlar (Afrikanı dolanaraq hərəkər) gündəmə gəlsə də, tankerlər marşrutları dəyişməyə tələsmirdilər. Lakin cari ilin yanvar ayında ABŞ və Böyük Britaniyanın husilərin hücumlarına cavab olaraq Yəmənə hücum etməyə başlayandan sonra hər şey dəyişdi.
2023-cü il dekabrın 19-dan etibarən Birləşmiş Ştatlar, Böyük Britaniya, Kanada və Fransa da daxil olmaqla bir sıra digər ölkələrlə birlikdə Qırmızı dənizdə naviqasiya azadlığını təmin etmək üçün əməliyyatın keçirilməsinə başlanıldı. 12 fevralda isə Avropa İttifaqı da bu əməliyyatlara öz dəstəyini ifadə etdi.
Qeyd edək ki, yanvarın 12-dən “Brent” markalı neftin qiyməti ABŞ və Böyük Britaniyanın “Ənsar Allah” qruplaşmasının nəzarətində olan Yəmənin şəhərlərinə raket hücumlarının başlaması fonunda 80 dollar/bareli həddini aşıb.
“S&P Global” analitikləri isə bildirirlər ki, Qırmızı dənizdə gəmiçilik marşrutlarına edilən silsilə hücumlar hələ də neft tədarükündə nəzərə çarpacaq fasilələrə səbəb olmayıb, lakin Qərbin neft idxal edən ölkələri “hər hansı bir eskalasiyanın vəziyyəti kökündən dəyişə biləcəyindən qorxaraq yuxusuz gecələr keçirməyə məcburdurlar”.
