Azərbaycanda avtomobil və təyyarə yanacağı istehsalı azalıb

2023-cü ilin yanvar-fevral aylarında Azərbaycanda neft məhsullarının istehsalı ötən ilin müvafiq dövrünün göstəricisi ilə müqayisədə dəyər ifadəsində 6,4% – 646,5 milyon manata qədər (cari məzənnə ilə təxminən $380,39 milyon) azalıb.

Bu barədə Azərbaycan Respublikası Dövlət Statistika Komitəsinin aylıq hesabatında məlumat verilir.

Avtomobil benzini istehsalı 3,7% – 216,8 min tonadək, təyyarə yanacağı 7,5% – 85,7 min tonadək, qazoyl (dizel yanacağı) 0,6% – 356 min ton, soba mazutu 90,8% – 3,1 min tonadək, maye qaz istehsalı 6,4% – 45,7 min tonadək, neft bitumu istehsalı 47,1% – 20,2 min tonadək azalıb.

Yanvar-fevralda sürtkü yağları istehsalında 50,6% – 12,2 min tonadək, neft koksu istehsalında 12,8% – 41,4 min tonadək artım qeydə alınıb.

2023-ci il 1 mart tarixinə Heydər Əliyev adına Neft Emalı Zavodunun anbarlarında 22,2 min ton avtomobil benzini, 33,7 min ton təyyarə yanacağı, 79 min ton dizel yanacağı, 12,7 min ton soba mazutu, 7,7 min ton sürtkü yağı, 1,1 min ton maye qaz, 16 min ton neft bitumu, 48 min ton neft koksu qeydə alınıb.