Azərbaycanın energetika naziri Pərviz Şahbazovun ABŞ-ın Bakıdakı səfiri Örl Litzenberger ilə görüşü zamanı yaşıl enerjinin ixracı və gələcəkdə hidrogen istehsalı imkanları, eləcə də beynəlxalq şirkətlər ilə əməkdaşlıq məsələləri müzakirə edilib. Bu barədə Energetika Nazirliyidən məlumat verilir.
Nazirliyin saytındakı məlumatda qeyd olunur ki, görüşdə enerji sahəsində ikitərəfli əlaqələr, Cənub Qaz Dəhlizi Məşvərət Şurası çərçivəsində nazirlərin VIII toplantısına və dəhlizin genişlənmə perspektivlərinə dair müzakirələr aparılıb.
Şahbazov Məşvərət Şurasının VIII iclasının məhsuldar keçdiyini və bu toplantının Cənub Qaz Dəhlizinin gələcək inkişafı üçün faydalı olduğunu bildirib.
Görüşdə ABŞ səfiri təbii qazın enerji keçidində mühüm rol oynayacağını, “buna görə də təbii qaz layihələrinə investisiyaların təşviqinin vacib olduğunu” qeyd edib.
“Litzenberger Azərbaycanın etibarlı enerji təchizatçısı olduğunu vurğulayıb”, – məlumatda deyilir.
Tərəflər həmçinin bərpa olunan enerji layihələri ilə bağlı fikir mübadiləsi aparıblar.
