Türkmənistanın istehsal etdiyi ECO-93 markalı benzini ilk dəfə Özbəkistan Respublika Əmtəə və Xammal Birjasında satışa çıxarılıb. Başlanğıc qiyməti 0,1 ton üçün Özbəkistan milli valyutası ilə 600 min sumdur.
Caspian Barrel Özbəkistan Əmtəə və Xammal Birjasının mətbuat xidmətinə istinadən bildirir ki, benzin tədarükçüsü 2011-ci ildə Özbəkistanın Kaşkadərya bölgəsində qeydiyyatdan keçmiş “Nara-Komfort Servis” Məhdud Məsuliyyətli Cəmiyyətidir.
Malların çatdırılma şərtləri – satıcının Özbəkistandakı anbarından alma kimi qeyd olunub.
Yeni birja əmtəəsinin başlanğıc qiyməti 1 ton üçün 6 milyon sum və ya 585,31 dollar təşkil edir. Bu markalı benzinin bir tonu təxminən 1370 litrə bərabərdir. Türkmənistanın ekoloji cəhətdən təmiz benzininin 1 litri təxminən 0,43 dollar təşkil edir.
ECO-93 benzini 2019-cu ilin iyunundan Türkmənistanda Ovadantəpə zavodunda istehsal olunur. Müəssisə, Yaponiyanın “Kawasaki Heavy Industries” şirkəti və Türkiyənin inşaat holdinqi “Rönesans”ın bir konsorsiumu ilə “Türkmənqaz” Dövlət Konserni arasında bağlanmış müqavilə əsasında inşa edilmişdir.
EURO-5 standartına cavab verən ECO-93 benzini təbii qazdan istehsal olunur. Buna sintetik benzin də deyilir.
İstehsalçının rəsmi məlumatına görə, ECO-93 avtomobil benzini istifadə edilərkən atmosferə atılan zərərli kükürd oksid emissiyaları 50 dəfə, azot oksidi – 5 dəfə, karbonmonoksit – 2 dəfə, karbohidrogen – 20% -ə qədər azalır.
