Dünya Bankı $143 mln-luq “Təmiz enerji” layihəsini Özbəkistanda həyata keçirməyə hazırlaşır. Özbəkistan hökumətinə ayrılacaq güzəştli kredit 800-dən çox təhsil və səhiyyə müəssisəsi binalarında enerji səmərəliliyinin artırılmasına yönəldiləcək.
Caspian Barrel Özbəkistanın Energetika nazirliyinin Teleqram-kanalındakı informasiyaya istinadən xəbər verir ki, beş illik güzəşt dövrü də daxil olmaqla, 30 il ödəmə müddəti ilə aşağı faizlə ayrılan vəsait Energetika nazirliyi tərəfindən İnvestisiya və Xarici Ticarət Nazirliyi ilə birgə hazırlanmış “Özbəkistanda sosial binalar üçün təmiz enerji” layihəsinin icrasına sərf ediləcək.
Layihə Özbəkistanın bütün regionlarını əhatə edəcək. 800-dən çox məktəbəqədər təhsil, orta təhsil və səhiyyə müəssisələri binalarının
enerji səmərəliliyinin artırılmasını nəzərdə tutur.
Layihə fəaliyyətləri enerji istehlakını kifayət qədər azaltmağa, ətraf mühitin yaxşılaşdırılmasına, xüsusilə qış aylarında müəssisələrin enerji təchizatının etibarlılığını artırmağa yönəlib.
Özbəkistanda ictimai binaların əksəriyyəti 1970-1980-ci illərdə enerji səmərəliliyi aspektləri nəzərə alınmadan tikilib. Bu buinalar zəif istilik izolyasiyasına malikdir və müasir dövrün tələblərinə uyğun istilik rahatlığı standartlarına cavab vermir. Onlar hələ də Sovet dövrünün enerji sərfiyyatı yüksək olan köhnə qazanxanalrdan və su isitmə sistemlərindən istifadə edirlər.
Dünya Bankının 2021-ci ildə apardığı araşdırma göstərib ki, məktəbəqədər, məktəb və tibb müəssisələrində enerji səmərəliliyinin artırılması hesabına illik enerjiyə qənaət potensialı 7 min MVt/saatdan çoxdur.
