Azərbaycanda gündəlik neft hasilatı yanvar ayı ilə müqayisədə 12,8 min barel azalıb
Neft İxrac edən Ölkələr Təşkilatına (OPEC) üzv olan və kartelə daxil olmayan ölkələrin neft hasilatının azaldılması ilə bağlı Vyana razılaşmasına uyğun olaraq Azərbaycan cari ilin aprel ayı ərzində gündəlik neft hasilatı ilə bağlı məlumatları Birgə Monitorinq Komitəsinin Müştərək Texniki Komissiyasına təqdim edib.
Caspian Barrel-ə AR Energetika nazirliyindən verilən məlumata görə, cari ilin aprel ayı ərzində ölkə üzrə gündəlik neft hasilatı 781,1 min barrel olub.
Bunun 726,8 min barrelini xam neft, 54,3 min barrelini kondensat təşkil edib.
Gündəlik 601,6 min barrel xam neft, 54,3 min barrel kondensat, 19,0 min barrel isə neft məhsulları ixrac edilib.
Beləliklə, 11 ölkənin 2017-ci il yanvarın 1-dən gündəlik neft hasilatını 558 min barrel azaltmaq barədə razılaşması çərçivəsində Azərbaycan hasilatı sutkada 35 min barrel azaltmaqla bağlı götürdüyü öhdəliyi tam yerinə yetirib.
Qeyd edək ki, yanvar ayı ərzində Azərbaycan üzrə gündəlik neft hasilatı 793,9 min barrel, fevral ayında 776,4 min barrel, mart ayında isə 733,3 min barrel olub.
Azərbaycanda gündəlik hasilat (min barellə):
| Aylar | Xam neft | Kondensat | Cəmi |
| Yanvar | 743,1 | 50,8 | 793,9 |
| Fevral | 726,4 | 50,0 | 776,4 |
| Mart | 693,3 | 40,0 | 733,3 |
Xatırladaq ki, ötən il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub.
Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb.
Saziş bu ilin birinci yarısı üçün bağlanıb və ilin ikinci yarısı üçün Sazişin müddətinin uzadılması, yaxud digər hansısa bir qərarın qəbulu OPEC-in Nazirlər Şurasının 25 may 2017-ci il tarixində Vyanada keçiriləcək 172-ci iclasında müəyyənləşəcək.
