Azərbaycan Respublikasının Prezidenti İlham Əliyev martın 13-də “bp plc” şirkətinin yeni baş icraçı direktoru Mürrey Aukinklosu qəbul edib.
Caspian Barrel dövlət başçısının rəsmi saytına istinadən xəbər verir ki, Mürrey Aukinklos İlham Əliyevi prezident seçkilərində qələbəsi münasibətilə təbrik edib.
Bakıya səfərindən məmnunluğunu ifadə edən qonaq Azərbaycanın 30 ildə qazandığı nailiyyətlər münasibətilə də təbriklərini çatdırıb, bu müddətdə ölkəmizdə enerji resurslarından əldə olunan gəlirlərin iqtisadiyyatımızın inkişafına yönəldilməsinin önəmini vurğulayıb. Mürrey Aukinklos Azərbaycan ilə bp-nin əməkdaşlığını məmnunluqla qeyd edib.
Prezident İlham Əliyev uzun illər ərzində ölkəmizin bp ilə səmərəli əməkdaşlıq həyata keçirdiyini deyib. Dövlətimizin başçısı 1994-cü ildə imzalanan “Əsrin müqaviləsi”nin önəmini vurğulayaraq, həmin dövrdən başlayaraq Azərbaycan ilə bp arasında strateji tərəfdaşlığın həyata keçirildiyini qeyd edib. Azərbaycan Prezidenti ölkəmizdə enerji resurslarının istehsalından əldə olunan gəlirlərin iqtisadi, sosial və bütün digər sahələrin inkişafına səmərəli surətdə yönəldildiyini bildirib.
Görüşdə ölkəmizlə əməkdaşlığın nəticələrindən biri olaraq Azərbaycanın bölgənin bir sıra və Avropa dövlətlərinin enerji təhlükəsizliyinə, xüsusilə dayanıqlı qaz təchizatına töhfəsinə toxunulub, yeni dövrdə ölkəmizin karbohidrogen enerji resursları ilə yanaşı, bərpaolunan enerji mənbələrinin potensialı qeyd edilib, o cümlədən işğaldan azad edilmiş ərazilərimizdə bu il BP şirkəti tərəfindən bu istiqamətdə layihənin həyata keçiriləcəyi vurğulanıb.
Söhbət zamanı BP ilə SOCAR arasında gələcək əməkdaşlıq məsələləri müzakirə olunub.
Xatırladaq ki, Britaniyanın enerji nəhəngi ola bp şirkəti Bakıda ofisini 1992-ci ildə açıb.
2024-cü il 17 yanvar tarixində Mürrey Aukinklos “bp plc”-nin baş icraçı direktoru təyin edilib. O, şirkətin əvvəlki rəhbəri Bernard Luninin istefasından sonra 2023-cü ilin sentyabrından bp-nin baş direktoru vəzifəsini icra edirdi.
Kanada vətəndaşı olan Aukinklos 1998-ci ildə işlədiyi “Amoco Canada”-nın Britaniya şirkəti ilə birləşməsindən sonra bp komandaına qoşulub. O, 2020-ci ilin iyulundan 2023-cü ilin sentyabrına qədər bp-nin baş maliyyə direktoru vəzifəsində çalışıb. Əvvəllər isə bp-nin “upstream” (hasilat) bölməsinin maliyyə direktoru olub.
