Fevralın 13-də “Şahdəniz 2” layihəsi çərçivəsində “Şahdəniz” yatağının şimal-şərq cinahından hasilat başlayıb. Bu haqda layihənin operatoru “bp-Azerbaijan” şirkəti bu gün məlumat yayıb.
Məlumata görə, ilin əvvəllərinə planlaşdırılmış bu hadisə əməliyyat şirkəti tərəfindən tam təhlükəsiz şəkildə yerinə yetilirilib.
Bundan əvvəl şimal-şərq cinahında bütün əlaqədar tikinti işləri və istismar sınaqları uğurla başa çatdırılıb və sistem bütövlükdə istismara təhvil veriliib.
Yenicə istismara başlamış şimal-şərq cinahında hazırda 5 quyu, iki hasilat manifoldu, ümumilikdə təqribən 30 km uzunluğu olan iki yeni boru xətti və “Şahdəniz” qaz və kondensat yatağına inteqrasiya edilmiş bir neçə sualtı qurğu var.
bp bilrir ki, “Şahdəniz” yatağının mövcud qurğularının hasilat gücü hazırda gündəlik olaraq 79 milyon kubmetr, illik isə təqribən 29 milyard kubmetrdir.
Xatırladaq ki, 2023-cü ilin nəticələrinə görə, “Şahdəniz” yatağında 26 milyard kubmetr qaz hasil edilib ki, bu da 2022-ci illə müqayisədə 4% artım deməkdir.
AR Energetika nazirliyinin məlumatına əsasən, 2006-cı ilin dekabrından 2024-cü ilin 1 fevral tarixinədək “Şahdəniz” yatağından 211,4 milyard kubmetr qaz və 45 milyon ton kondensat hasil edilib. Bu dövrdə “Şahdəniz” yatağından hasil edilən qazın 150 milyard kubmetri ixraca nəql edilib, 61,4 milyard kubmetri isə Azərbaycanın daxili bazarının ehtiyaclarının ödənilməsinə yönəldilib.
