Baş nazir Əli Əsədov və BP-nin vitse-prezidenti ilə Şərqi Zəngəzurda günəş elektrik stansiyasının tikintisini müzakirə ediblər
bp-nin hasilat və əməliyyatlar üzrə icraçı vitse prezidenti Qordon Birrel 16-20 yanvar tarixlərində Bakıda 5-günlük planlaşdırılmış işgüzar səfərdə olub. Bu haqda Caspian Barrel “bp-Azərbaycan” şirkətinin mətbuat xidmətinə istinadən xəbər verir.
Məlumata əsasən, bp qrupunun bir sıra yüksək səviyyəli mütəxəssislərinin də daxil olduğu səfərdə məqsəd şirkətin regiondakı biznesinin gedişi və əməliyyatçısı olduğu layihələr üzrə 2024-cü il üçün planlaşdırılmış işlərlə tanış olmaq idi.
Səfər proqramı çərçivəsində cənab Birrellə Azərbaycan Respublikasının Baş naziri cənab Əli Əsədov, İqtisadiyyat naziri cənab Mikayıl Cabbarov, Ekologiya və Təbii Sərvətlər naziri cənab Muxtar Babayev və SOCAR-ın prezidenti cənab Rövşən Nəcəf arasında işgüzar görüşlər də olmuşdur. Bu görüşlərdə bp-nin dünya üzrə, həmçinin regiondakı biznesinin gedişi, icraçısı olduğu enerji layihələri çərçivəsində görülən işlərin hazırkı vəziyyəti və bp-nin Azərbaycanın enerji keçidinə dəstək məqsədli fəaliyyətləri ilə bağlı məsələlər müzakirə olunmuşdur.
Səfər zamanı cənab Birrel şirkətin regiondakı işçi heyəti ilə də görüşmüş və bp-nin əməliyyatçısı olduğu layihələrdəki hazırkı vəziyyət və görüləsi perspektiv işlər haqqında şirkətin regional rəhbərliyi ilə müzakirələr aparmışdır.
Cümə günü 19 yanvar tarixində cənab Birrel bp-nin əməliyyatçısı olduğu və dənizdə yeni quraşdırılmış Azəri Mərkəzi Şərqi (ACE) platformasına səfər etmiş və bu ilin əvvəllərinə planlaşdırılmış ilk ACE neftinin əldə olunması üçün aparılan hazırlıq işləri ilə tanış olmuşdur.
Caspian Barrel
