Murrey Okinkloss “BP plc” şirkətinin baş icraçı direktoru təyin olunub. Bu barədə şirkətin məlumatında deyilir.
Bu gündən bp-nin London ofisindən Qrupa rəhbərlik Kanada vətəndaşı olan Mürrey Okinkloss tərəfindən həyata keçitiləcək.
Əslində ötən ilin sentyabrından əvvəlki rəhbərin qəfil istefasından sonra Murrey müvəqqəti olaraq baş icracı direktor vəzifəsini icra edirdi. O zamandan şirkətin rəhbərliyi axtarışda idi və hətta iki qadın namizəd də bu posta nəzərdən keçirilirdi.
Mürrey ixtisasca maliyyəçidir, 2020-ci ildən bp-nin Baş maliyyə direktoru vəzifəsini tuturdu. Btitaniya şirkətinə gəlişi isə 1998-ci ilə təsadüf edir: o zaman ki, bp gənc Mürreyin çalışdığı ABŞ-ın “Amoco” neft şirkətinə sahib çıxdı…
Bəs onun gəlişi bp-də dəyişiklik yaradacaqmı? Çünki bundan əvvəlki rəhbər Bernard Luni az qala neft-qaz şirkətini 180 dərəcə YAŞIL zonaya yönəltmək istəyirdi, nəticədə ancaq 1 il bp-nin səhmləri üzü yuxarı getdi (2022-ci ildə, o da Rusiya-Ukrayna müharibəsinin fəsadlarına görə), son 1 ildə şirkətin səhmləri 7%-dək ucuzlaşıb…
Bizi düşündürən isə odur ki, maliyyəçi rəhbər bp-nin Azərbaycandakı layihələrinə, əsasən də “Azəri-Çıraq-Günəşli”yə necə münasibət bəsləyəcək?
Mənim bildiyimə görə, 2024-cü il üçün bp-nin Azərbaycandakı layihələri üzrə xərcləmələri maksimal dərəcədə OPTİMALLAŞDIRIBLAR… amma Azərbaycan bp-nin biznesi üçün maliyyə baxımından olmasa da, imic formalaşdıran məkan olub.
Çünki heç bir Qərb şirkətinin dünya bazarlarına birbaşa çıxışı olmayan Xəzər kimi bölgədə ilk dəfə dəniz neftinin kommersiya hasilatını (AÇG), ilk dəfə 90-cı illərdə ixrac boru kəmərinin tikintisini (Bakı-Supsa), ilk dəfə Xəzəri dünya okeanı ilə birləşdirəcək Bakı-Tbilisi-Ceyhan kimi əsas neft kəmərinin tikintisi kimi layihələr məhz Britaniyanın neft nəhənginin operatorluğu altında gerçəkləşdirilib.
Bundan əlavə bp-nin tarixində ilk nəhəng QAZ layihəsi məhz ŞAHDƏNİZ olub və onun üzərində böyük bir biznes seqmenti yaradılıb…
Təbii ki, bp-də kimin icraçı direktor olmasından asılı olmayaraq Direktorlar Şurası bu sadaladığım amilləri , həmçinin regiona Xəzərdən açılan MƏNZƏRƏnin Azərbaycanla bağlantılarını gözəl bilirlər.
İlham Şaban
Caspian Barrel
