Yanvar-sentyabr aylarında “Şahdəniz” yatağından qaz hasilatı 6,5% artıb

2023-cü ilin yanvar-sentyabr aylarında “Şahdəniz” yatağından qaz hasilatı ötən ilin müvafiq dövrü ilə müqayisədə 6,5% artaraq 19,7 milyard kubmetr təşkil edib.

“İnterfaks-Azərbaycan” agentliyinin verdiyi xəbərə görə, bu barədə Energetika Nazirliyinin məlumatında deyilir.

2023-cü ilin yanvar-sentyabr ayları üzrə operativ məlumatlara əsasən, 9 ay ərzində respublikada 36,1 milyard kubmetr təbii qaz hasil edilib ki, bu da 2022-ci ilin göstəricisindən 5% çoxdur. Qazın 9,6 milyard kubmetri “Azəri-Çıraq-Günəşli”dən (azalma 4% – İF), 19,7 milyard kubmetri “Şahdəniz”dən (artım 6,5% – İF), 0,4 milyard kubmetri “Abşeron”dan, 6,4 milyard kubmetri SOCAR (artım 8,5% – İF) üzrə hasil olunub.

“Azəri-Çıraq-Günəşli” və “Şahdəniz” yataqları istismara veriləndən 01 oktyabr 2023-cü il tarixinədək “Azəri-Çıraq-Günəşli”dən 213 milyard kubmetr, “Şahdəniz”dən isə 202,5 milyard kubmetr qaz hasil edilib. Bu dövrdə “Şahdəniz” yatağından hasil edilən qazın 143 milyard kubmetri ixraca nəql edilib.

“Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və elə həmin ilin dekabrın 12-də qüvvəyə minib. Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun işlənməsi haqqında 2050-ci ilədək olan dövrü əhatə edən yeni müqavilə imzalanıb.

Yeni müqavilə üzrə BP (Britaniya – layihənin operatoru) 30,37%, SOCAR 25%, MOL (Macarıstan) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, “ITOCHU Oil” (Yaponiya) 3,65%, “Equinor” (Norveç) 7,27%, TPAO (Türkiyə) 5,73% pay sahibidir.

“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları bp (operator – 29,99%), LUKOIL (19,99%), TPAO (19%), “Cənub Qaz Dəhlizi” QSC (21,02%) və NICO şirkətidir (10%).

“Şahdəniz” yatağından qaz hasilatına 2006-cı ilin dekabr ayında başlanılıb.