2022-ci ilin yekunları üzrə SOCAR-ın gəlirləri 119 milyard 228 milyon manat təşkil edib ki, bu da 2021-ci ilin göstəricisindən 53,8% çoxdur.
“İnterfaks-Azərbaycan” agentliyinin verdiyi xəbərə görə, bu barədə şirkətin 2022-ci il üzrə birləşdirilmiş maliyyə hesabatında deyilir. SOCAR-ın 2022-ci il ərzindəki maliyyə fəaliyyətinin Maliyyə Hesabatlarının Beynəlxalq Standartlarına uyğun auditi “Ernst & Young” şirkəti tərəfindən aparılıb.
2022-ci ildə şirkətin xalis mənfəəti 9 milyard 424 milyon manat (artım 4,5 dəfə) təşkil edib.
“Qlobal iqtisadi aktivliyin zəifləməsinə və qlobal inflyasiya təzyiqinə baxmayaraq, SOCAR 2022-ci ili yüksək nəticələrlə başa vurmağa nail olub. Müvəffəqiyyəti şərtləndirən amillər sırasında idarəetmənin təkmilləşdirilməsi, texniki, texnoloji və kommersiya əməliyyatlarının səmərəli həyata keçirilməsi, maliyyə resurslarının daha rentabelli idarə edilməsi, innovativ və beynəlxalq təcrübələrin tətbiqi, habelə həyata keçirilən optimallaşdırma və texnoloji transformasiya tədbirləri xüsusi yer tutub. Hesabat dövründə SOCAR-ın gəlirlərinin artmasına müəssisələrin daha səmərəli idarəedilməsi və inteqrasiyalı fəaliyyəti, rəqəmsal enerji texnologiyalarının yaratdığı əlavə dəyər, həmçinin dünya bazarında neft, qaz və neft-kimya məhsullarının qiymətlərinin yüksəlməsi səbəb olub”, – deyə şirkətin şərhində bildirilir.
SOCAR gəlir marjasını 11,4%-dən 12,3%-ə, əməliyyat fəaliyyətindən mənfəətini isə 1,9 dəfə – 9 milyard 362 milyon manata qədər artıraraq 2022-ci ili 9 milyard 424 milyon manat xalis mənfəətlə başa vurub. “Qeyd edək ki, bu, şirkətin konsolidasiya olunmuş maliyyə hesabatlarının hazırlanmağa başladığı 2008-ci ildən etibarən ən yüksək göstəricidir”, – deyə hesabatda vurğulanır.
Hesabat ilində SOCAR-ın satışlarının maya dəyəri 104 milyard 526 milyon manat (artım 52,2%), mənfəət vergisi xərci 1 milyard 439 milyon manat (artım 23,8%) təşkil edib.
2022-ci ildə şirkətin ümumi aktivləri 16,5% – 80 milyard 835 milyon manata qədər, o cümlədən cari aktivləri 39,6% – 33 milyard 431 milyon manata qədər, uzunmüddətli aktivləri 4,4% – 47 milyard 404 milyon manata qədər artıb.
SOCAR-ın cəmi kapitalında və nağd pul vəsaitlərinin həcmində də artım tendensiyası müşahidə olunub. Belə ki, SOCAR-ın cəmi kapitalı 46,5% artaraq 33,34 milyard manata, nağd pul vəsaitləri isə 38,6% artaraq 12,49 milyard manata yüksəlib.
2022-ci ilin sonuna şirkətin nizamnamə kapitalı 5 milyard 546 milyon manata (artım 4,8%) bərabərdir.
2022-ci ildə SOCAR-ın öhdəlikləri 1,9% – 47 milyard 500 milyon manata qədər artıb, o cümlədən uzunmüddətli öhdəlikləri 18 milyard 530 milyon manat (azalma 29,5%), cari öhdəlikləri 28 milyard 970 milyon manat (artım 42,7%) təşkil edir.
