Söhbət Mingəçevir şəhərində 2025-ci ildə istifadəyə veriləcək Azərbaycanın ikinci ən böyük istilik-elektrik stansiyasında quraşdırılacaq turbinlərdən gedir
Bu gün Bakıda Azərbaycanın energetiklər şəhəri Mingəçevirdə tikiləcək 1280 MVt gücündə istilik elektrik stansiyasının təməlqoyma mərasimi keçirilib.
“Gülüstan” sarayında baş tutan mərasimdə Azərbaycan prezidenti İlham Əliyev iştirak edib.
İlham Əliyevin sözlərinə görə, Azərbaycanın ikinci ən böyük istilik elektrik stansiyası olacaq bu enerji obyektinin tikintisi təxminən 400 milyon dollara başa gələcək.
Dövlət başçısı bildirib ki, bu stansiyaya sərf ediləcək vəsait bir qayda olaraq, bu böyüklükdə stansiyaların tikintisinə sərf olunan vəsaitdən 3-4 dəfə aşağıdır. “Bunun da səbəbi, əlbəttə ki, səmərəlilikdir. Eyni zamanda, bunun səbəbi odur ki, Mingəçevirdə artıq güclü elektroenergetika infrastrukturu yaradılmışdır və bu stansiyanın məhz Mingəçevirdə inşa edilməsi də ilk növbədə bu məqsədi güdür”, deyə İlham Əliyev vurğulayıb.
“Hazırda Azərbaycanın elektrik stansiyalarının generasiya gücü 7200 MVt təşkil edir ki, bunun da 3400 MVt-ı son 20 ildə yaradılıb, 34 elektrik stansiyası tikilib”, deyə Azərbaycan prezidenti bəyan edib.
Elektrik stansiyası “Azərenerji” ASC tərəfindən tikiləcək, stansiya üçün 4 turbin və generator isə İtaliyanın “Ansaldo Energia” şirkəti tərəfindən təmin olunacaq.
İtaliya şirkətinin tədarük edəcəyi dörd ədəd AE94.3A markalı qaz turbininin müqavilə dəyəri 160 milyon avrodan yuxarıdır. “Ansaldo Energia” şirkətinin saytında yer alan məlumatda bildirilir ki, AE94.3A markalı qaz turbininin enerji səmərəliliyi 40,3% təşkil etməklə yanaşı 340 MVt elektrik enerjisi istehsal etməyə qadirdi.
“Ansaldo Energia” indiyə qədər dünyanın 16 ölkəsində 80 kombinə edilmiş dövrə enerji qurğusu və 16 açıq dövrəli enerji qurğusu quraşdırıb.
Layihə aşağıdakı kimi maliyyələşdiriləcək: 60% “Azərenerji”nin öz vəsaiti, 40% kredit vəsaiti hesabına.
Layihə qrafikinə əsasən, elektrik stansiyası 2025-ci ildə istifadəyə veriləcək.
“Azərbaycan İtaliya üçün strateji ölkədir və “Ansaldo Energia” 2020-ci ildən etibarən Azərbaycan bazarına güclü maraq göstərib və bu illər ərzində yüksək səviyyəli şəxslərlə çoxsaylı institusional görüşlər keçirib. Biz əhəmiyyətli biznes imkanlarını müəyyən etdik və nəticədə ölkənin enerji inkişafına töhfə vermək üçün Azərbaycanda öz filialımızı açmağa qərar verdik”, – deyə şirkətin Beynəlxalq və İctimai Əlaqələr şöbəsinin müdiri Stefano Santinelli bildirib.
Xatırladaq ki, 2020-ci il dekabrın 18-də “Azərenerji” ASC ilə İtaliyanın “Ansaldo Energia” şirkəti arasında Azərbaycanın işğaldan azad edilmiş ərazilərində – Ağdam, Füzuli, Qubadlı və Kəlbəcərdə tikilmiş 110 kVt gücündə yarımstansiyalar üçün enerji avadanlıqlarının təchizatına dair müqavilə imzalanıb.
“Ansaldo Energia” şirkətinin Azərbaycandakı nümayəndəliyi 30 iyul 2021-ci il tarixində qeydiyyatdan keçib. Şirkətin rəsmi nümayəndəsi İtaliya vətəndaşı Stefano Bogiadır.
“Ansaldo Energia S.p.A” şirkəti səhmlərinin 59,9%-i “Cassa Depositi e Prestiti” qrupuna daxil olan “CDP Equity” fonduna məxsusdur, yerdə qalan hissə isə elektrik enerjisi sənayesi üçün maşınqayırma avadanlığı üzrə ixtisaslaşmış, bu sahədə dünya lideri olan “Shanghai Electric”-in nəzarətindədir.
