SOCAR “Ümid” yatağından qaz hasilatını 17,4% artırmağı planlaşdırır
2022-ci il martın 1-nə Bakıdan 75 km cənubda yerləşən “Ümid” dəniz qaz-kondensat yatağında 5,4 milyard kubmetr təbii qaz və 856,1 min ton kondensat hasil edilib.
Caspian Barrel bu barədə Azərbaycan Dövlət Neft Şirkətinin (SOCAR) sosial şəbəkədəki səhifəsində yerləşdirilən məlumatına əsasən bildirir.
Məlumata görə, yataqda karbohidrogen hasilatı 2012-ci ilin sentyabrında başlayıb. 2020-ci ildə yataqda illik qaz hasilatı ilk dəfə olaraq 1 milyard kubmetr həcmlərini keçərək 1,091 milyard kubmetr təşkil edib. 2021-ci ilin yekunlarına görə, Ümid yatağından 1,115 milyard kubmetr qaz çıxarılıb.
SOCAR-ın proqnozlarına əsasən, 2022-ci ildə “Ümid” yatağından 1,309 milyard kubmetr qaz və 194 min ton kondensat hasil edilməsi planlaşdırılır.
“Ümid” yatağından qaz hasilatının artması Azərbaycanın qaz sənayesində mühüm rol oynayır, çünki bu yataqdan hasil olunan mavi yanacaq tamamilə daxili bazarın tələbatına yönəldilir.
