Qərbi Azəri platformasında 2021-ci il aprel ayının 22-də başlanmış 15 günlük planlaşdırılmış profilaktik işlər proqramı təhlükəsiz şəkildə və uğurla başa çatıb.
Bu haqda bu gün Caspian Barrel-ə “BP-Azerbaijan” şirkətindən (“Azəri-Çıraq-Günəşli” yataqlar blokunun işlənməsi üzrə layihənin operatoru) məlumat veriblər.
Verilən məlumata görə, proqramda nəzərdə tutulmuş bütün işlər – inspeksiya və layihə işlərini vaxtından əvvəl – mayın 4-də uğurla tamamlamaq mümkün olub (ilkin qrafikə görə işləri mayın 6-da tamamlamaq nəzərdə tutulurdu) və artıq platformadan hasilat başlanılıb.
Hazırda hasilatın tədricən əvvəlki səviyyəyə çatdırılması plan üzrə davam edir.
Qeyd edək ki, BP şirkətinin I rübün yekunları ilə bağlı açıqlamasında bildirilirdi ki, AÇG-də istismarda olan 6 platforma içərisində “Qərbi Azəri” hazırda ən məhsuldarıdır – yanvar-martın orta gündəlik hasilat göstəricilərinə əsasən bu platformadan 130 min barel neft hasil edilir.
