Martın 2-də Eko-sürücülük simulyatorunun təqdimatı keçirilib.
AZƏRTAC xəbər verir ki, SOCAR-ın Nəqliyyat Departamentinin ərazisində keçirilən tədbirdə BMT-nin İnkişaf Proqramının (BMTİP) Azərbaycandakı rezident nümayəndəsinin müavini Alessandro Frakassetti və SOCAR-ın ekologiya üzrə vitse-prezidenti Rəfiqə Hüseynzadə iştirak edib.
Bildirilib ki, Qlobal Ekoloji Fond (GEF) tərəfindən maliyyələşdirilən, BMTİP və SOCAR tərəfindən birgə həyata keçirilən “Azərbaycanın yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planları” (NAMA) layihəsi çərçivəsində işlənən komponentlərdən biri SOCAR-da Dayanıqlı Nəqliyyat proqramıdır. GEF-in layihə ssenarisi həmin komponent üzrə SOCAR-ın nəqliyyat sistemində enerji səmərəliyi və təhlükəsiz sürücülük üslublarının təqdim olunmasını nəzərdə tutur.
Beynəlxalq təcrübəyə əsasən, enerji səmərəli və təhlükəsiz sürücülük mövzusunda təlim keçmiş sürücülər nəqliyyat vasitələrinin emissiyalarını ən azı 10-15 faiz azaltmaq imkanına malik olurlar. Bu da uzun müddətli perspektivdə SOCAR-ın nəqliyyat effektivliyini inkişaf etdirməyə imkan verəcəkdir.
GEF layihəsi yanacaq növünün əvəzlənməsinə pilot investisiyalar qoyulmasında yardımçı olacaq və nəqliyyat sektorunda karbon qazının buraxılışını və eləcə də enerji intensivliyini azaltmaq mövzusunda ekoloji-sürücülük (eco-driving) təlim proqramları təşkil edir.
Təlim proqramı beynəlxalq təcrübəyə əsaslanaraq işlənib və hazırlanıb. SOCAR-da avtomobillərin idarə edilməsi sahəsində çalışan işçilərin böyük bir qismini əhatə edəcək. Bu fəaliyyət nəticəsində “Eko-sürücülük üzrə Milli Proqram”ın işlənib hazırlanacağı gözlənilir.
Layihə çərçivəsində birinci fazada 4 ədəd hibrid tipli minik avtomobili SOCAR-ın sürücülərinin ixtiyarına verilib. Eko-sürücülük metodologiyası üzrə sürücülərə həm nəzəri, həm də praktiki təlimlərin keçirilməsi üçün Eko-sürücülük simulyatoru SOCAR-a təhvil verilib.
Eko-sürücülük simulyatorunun istehsalçısı Fransanın “EDİSER” şirkətidir. Simulyator Azərbaycan yol və iqlim şəraitinə proqramlaşdırılıb, ölkənin yol hərəkəti qaydalarına uyğunlaşdırılıb. Simulyatorun üzərində minik, avtobus və yük maşınları üçün təlim keçmək mümkündür. Onun köməyi ilə ildə 1000-ə qədər sürücünün təlim keçmək imkanı yaranacaq. Eko-sürücülük sayəsində əldə edilən biliklər real həyatda tətbiq olunduqda ildə 1500 ton karbon emissiyasının (CO2) havaya atılmasının qarşısını almaq mümkün olacaq, bu da 600 ton yanacağa və ya ildə 300 min manata qənaət deməkdir.
