SOCAR-da çalışan 1000-dək sürücü eko-sürücülük simulyatoru üzrə təlimdə iştirak edəcək.
AZƏRTAC xəbər verir ki, bu sözləri jurnalistlərə müsahibəsində SOCAR-ın ekologiya üzrə vitse-prezidenti Rəfiqə Hüseynzadə deyib.
O bildirib ki, eko-sürücülük simulyatoru Fransanın “EDISER” şirkəti tərəfindən quraşdırılıb və SOCAR-ın sürücüləri burada təlim keçəcəklər. Layihənin ekoloji cəhətdən məqsədi sürücülər bu təlimdə iştirak edən zaman yanacağa qənaət olunacaq. Bu da atmosferə atılan karbon emissiyasının miqdarının ildə 1500 ton azalmasına səbəb olacaq. Bütün bu sadalananlar layihənin ekoloji cəhətdən əhəmiyyətini göstərir.
“Biz qlobal iqlim dəyişikliyinə ən böyük təsiri göstərən karbon emissiyasının azaldılmasına diqqəti yönəldirik. Bu, SOCAR-ın ekoloji layihələrindən biridir. SOCAR-da çalışan 1000-dək sürücü bu təlimdə iştirak etdikdən sonra şirkətin və BMT-nin İnkişaf Proqramının (BMTİP) birgə sertifikatını əldə edəcəklər. Layihə bütün növ nəqliyyat vasitələrinin sürücülərini əhatə edəcək. Bu, SOCAR-ın BMT-nin İnkişaf Proqramı ilə həyata keçirdiyi uğurlu ekoloji layihələrdən biridir”, – deyə Rəfiqə Hüseynzadə əlavə edib.
