Son beş il ərzində son dərəcə qətiyyətli idik və nəzərəçarpacaq inkişafa nail olduq. Güclü tərəfdaşlıqlar qurduq və çətinlikləri komandamızla birlikdə dəf etdik.
Bu haqda GL şirkəti yaranmasının 5 illiyi münasibəti ilə özünün sosial şəbəkə hesabında bəyan edib. Məlumatda “Biz GL komandasının hər bir üzvünə və tərəfdaşlarımıza töhfələrinə görə dərin minnətdarlığımızı bildiririk” deyə qeyd olunub.
Caspian Barrel xatırladır ki, GL Azərbaycanın ilk özəl yerli enerji şirkətidir. Şirkət Salyan rayonunda “Kürsəngi” və “Qarabağlı”, Abşeron yarımadasında “Buzovna-Maştağa”, “Qala” və “Zirə” olmaqla beş yataqda neft-qaz əməliyyatları həyata keçirir. GL-in biznes portfelinə “Salyan Oil Limited”, “Taghiyev Operating Company” əməliyyat şirkətləri və sənaye üzrə çoxsaylı xidmətlər təqdim edən “GL Technical Services” MMC daxildir.
GL Azərbaycanda neft-qaz əməliyyatlarına 2021-ci ildə başlayıb. Buna isə Çinin dövlət şirkəti olan CNPC-nin Azərbaycanın Salyan rayonunda yerləşən “Kürsəngi” və “Qarabağlı” neft yataqlarındakı payını tam şəkildə alması ilə nail olub.
19 noyabr 2021-ci ildə GL LTD “Salyan Oil Limited”də 50 faizlik hissəni satın alaraq SOCAR-la tərəfdaş oldu.
Hazırda GL şirkəti operator qismində “Kürsəngi” və “Qarabağlı” yataqlarında neft-qaz əməliyyatlarını həyata keçirir və ümumilikdə, blokun reabilitasiyası, kəşfiyyatı, işlənməsi və hasilatına cavabdehdir.
“Kürsəngi” və “Qarabağlı” yataqlarının sahəsi 450 kvadrat kilometrdir. Yataqlar uzun illərdir ki, istismardadır. Bu iki yataqdan sənaye əhəmiyyətli neftin alınmasına 1960-cı illərdən başlanılıb. “Qarabağlı” yatağında bugünədək 312 quyu, “Kürsəngi” yatağında isə 495 quyu qazılıb.
14 dekabr 2021-ci ildə isə GL Risk Xidmət Sazişi əsasında SOCAR-la “Buzovna-Maştağa”, “Qala” və “Zirə” yataqları üzrə müqavilə imzalayıb. 2022-ci ilin 1 iyul tarixindən isə həmin yataqların daxil olduğu blokun bərpası və işlənməsini həyata keçirir.
2023-cü ildə GL afilə edilmiş şirkəti “Taghiyev Operating Company” tərəfindən istismar edilən cari yataqlarda 15 faizdən artıq hasilat enməsinin qarşısını alaraq ilin əvvəli ilə müqayisədə gündəlik hasilatı 10 faizdən çox artırmağa nail olub.
Bundan əlavə, GL afilə şirkəti “Salyan Oil Limited” tərəfindən istismar edilən “Kürsəngi” və “Qarabağlı” neft yataqlarında 19 il davam edən hasilat enməsini dayandıraraq artıma nail olub. Bu uğurların hamısı böyük məbləğdə kapital investisiya edilmədən, yalnız səmərəli hasilat proqramlarının tətbiqi ilə əldə edilib.
2024-cü ildə GL şirkəti “Kürsəngi” və “Qarabağlı” yataqlarında dərinliyi 4000 metrdən çox olacaq iki yeni quyunun və iki yan lülənin qazılması ilə bağlı tender elan etməyi planlaşdırır.
GL operatoru olduğu yataqlarda yeni texnologiyalar tətbiq etməyi, ətraf mühitin mühafizəsinə nəzarət sistemi yaratmağı, bununla da insanların, ətraf mühitin, əmlakın mühafizə olunmasına diqqəti artırmağı hədəfləyib.
GL şirkəti həmçinin özünün ötən ilin dekabrında törəmə şirkəti olan “GL Technical Services” (GLTS) vasitəsilə sənaye xidmətləri üzrə dünya liderlərindən olan “Baker Hughes” ilə Anlaşma Memorandumu imzalayıb. Bu, GLTS-ə qabaqcıl texnologiyalardan istifadə etməyə və neft-qaz hasilatının artırılması, xərclərin optimallaşdırılması və əməliyyatların səmərəliliyinin artırılması da daxil olmaqla, istismar məsələlərinin həlli üçün kadrların səriştələrini qlobal sənaye standartlarına uyğunlaşdırmaq yolunda yeni imkanlar açır.
