Azərbaycan ərazisi vasitəsilə Mərkəzi Asiya ölkələrindən Avropaya elektrik enerjisinin ixracı imkanları üzrə texniki-iqtisadi əsaslandırılmanın hazırlanmasına bu il ərzində başlanılacaq.
Bunu jurnalistlərə açıqlamasında energetika nazirinin müavini Elnur Soltanov deyib.
O qeyd edib ki, layihə çərçivəsində qeyd olunan işlərin həyata keçirilməsi üçün şirkətin cəlb olunması üzrə texniki şərt artıq hazırdır.
“Məsləhətçi şirkətin cəlbi üçün artıq texniki tapşırıq hazırdır və yaxın tarixlərdə qiymətləndirmə ilə bağlı işlərə başlanılacaq”, – E. Soltanov bildirib.
Qeyd edək ki, “Xəzər-Qara dəniz-Avropa” Yaşıl Enerji Dəhlizinin yaradılması çərçivəsində Azərbaycan, Gürcüstan, Macarıstan və Rumıniya ötürücü sistem operatorları arasında birgə müəssisənin yaradılması üçün məsləhətçi hüquq şirkətinin müəyyənləşdirilməsi məqsədilə tender keçiriləcək.
“Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” 17 dekabr 2022-ci ildə Buxarestdə imzalanıb.
Nazir müavinin sözlərinə görə, bu layihəyə Özbəkistan və Qazaxıstan da xüsusi maraq göstərir: “Bununla bağlı 3 ölkənin nazirləri arasında kommunike imzalanıb”.
O vurğulayıb ki, bu, Avropa İttifaqı ilə “yaşıl enerji” istiqamətində aparılan işlər çərçivəsində reallaşma imkanı yüksək olan layihədir.
