“Lightsource bp” şirkəti (“bp”-nin törəmə şirkəti) cari il martın sonunadək Cəbrayılda tikiləcək 240 meqavat gücündə “Şəfəq” Günəş Elektrik Stansiyasının tikintisinin Ətraf Mühitə Təsirinin Qiymətlənsirilməsi hesabatının son varinatını Azərbaycan Ekologiya və Təbii Sərvətlər Nazirliyinə təqdim etməyi planlaşdırır.
Bu barədə BP-nin Ətraf mühit və sosial məsələlər üzrə baş planlama mütəxəssisi Aaron Sheehan məlumat verib.
“İnterfaks-Azərbaycan” onun sözlərinə istinadən xəbər verir ki, hesabatda ətraf mühitin və sosial mühitin mövcud vəziyyəti barədə məlumatlar öz əksini tapıb, layihənin həyata keçirilməsinin ekologiyaya təsiri ilə bağlı proqnozlar və ətraf mühitə və əhaliyə hər hansı potensial təsirin minimuma endirilməsi və azaldılması tədbirləri qeyd olunub.
Sheehan əlavə edib ki, günəş elektrik stansiyası Cəbrayıl şəhərindən 5-10 km məsafədə (stansiya ərazi baxımından iki hissədə yerləşdiriləcək ) inşa olunacaq.
“Tikinti işlərinə bu ilin ikinci yarısında başlanılması planlaşdırılır və bütövlükdə 18 ay dvam edəcək”, – Sheehan deyib.
“BP-Azerbaijan” şirkətinin mətbuat xidmətinin rəhbəri Tamam Bayatlı öz növbəsində vurğulayıb ki, şirkət cari ildə Azərbaycan hökuməti ilə sözügedən GES-in tikintisi üzrə yekun investisiya qərarının (YİQ) imzalanmasını nəzərdə tutur.
Hesabata əsasən, GES Cəbrayıl rayonunda, Araz çayından şimal-qərbdə, Cəbrayıl şəhərindən 6 km cənubda, Hacılı qəsəbəsi yaxınlığında tikiləcək. Stansiyanın ərazisi 802 hektar olacaq, stansiya 240 MVt generasiya gücünə malik olacaq, pik həddi 288 MVt-a çata bilər.
Layihəyə layihələndirilmə, avadanlıqların tədarükü, tikintisi, montajı, sınaqlar, fotoelektrik günəş elektrik stansiyasının istifadəyə verilməsi və istismarı daxildir.
«Lightsource bp» şirkəti stansiyanın tikintisinə, istifadəsinə və istismarına cavabdeh olacaq.
Elektrik stansiyasının istehsal etdiyi elektrik enerjisi sonda Azərbaycanın milli elektrik şəbəkəsinə ötürüləcək. Layihə çərçivəsində həmçinin 33/330 kV yarımstansiyanın tikintisi planlaşdırılır.
Qrafikə əsasən, 2024-cü ilin iyulundan oktyabr ayına qədər «Lightsource bp» şirkəti qüvvə və vasitələrin (işçi qüvvəsi, texnika və s.) səfərbərliyi və ərazinin hazırlanması işlərini aparmağı planlaşdırır. GES-in tikintisi 2024-cü ilin oktyabrından 2025-ci ilin noyabrına qədər aparılacaq, işə salma-tənzimləmə sınaqları 2025-ci ilin noyabrında başlayacaq, stansiyanın kommersiya istismarı 2025-ci ilin dekabrından başlayacaq.
6-8 ay ərzində tikinti işçilərinin orta hesabla 300 nəfərə, pik dövründə 700 nəfərə çatacağı gözlənilir.
Azərbaycan prezidenti İlham Əliyev bəyan edib ki, “Şəfəq” günəş enerji stansiyasının (GES) tikintisi Səngəçal terminalınn elektrik enerjisi ilə təmin etməyə və onların istifadə etdiyi qazı Avropaya ixrac etməyə imkan verir. Stansiyada illik 500 mln kVt/saat elektrik enerjisinin istehsalı proqnozlaşdırılır.
bp şirkəti 2024-cü ildə Azərbaycan hökuməti ilə Azərbaycanın Cəbrayıl rayonunda (Şərqi Zəngəzur iqtisadi rayonu) «Şəfəq» günəş elektrik stansiyasının tikintisi layihəsi üzrə yekun investisiya qərarı (YİQ) imzalamağa ümid edir.
2021-ci il iyunun 3-də Energetika Nazirliyi və BP arasında Cəbrayıl rayonunda 240 MVt gücündə günəş elektrik stansiyasının inşası layihəsinin qiymətləndirilməsi və həyata keçirilməsi sahəsində əməkdaşlığa dair İcra Müqaviləsi imzalanıb. Layihəyə investisiya qoyuluşu $200 milyon məbləğində qiymətləndirilir.
21 sentyabr 2023-cü ildə SOCAR şirkəti və Azərbaycan İnvestisiya Şirkəti (AİŞ) arasında Cəbrayıl rayonunda (Şərqi Zəngəzur iqtisadi rayonu) “Şəfəq” günəş elektrik stansiyası layihəsinə Qoşulma Sazişi imzalanıb.