Dünya Bankı Azərbaycanda binalarda enerji effektivliyini artırmaq üçün yeni yanaşmaların tətbiqini zəruri hesab edir.
Cümə axşamı Bakıda Azərbaycan hökuməti, enerji və kommunal xidmətlər sektoru, beynəlxalq maliyyə təşkilatları və donor təşkilatlarının nümayəndələrinin iştirakı ilə Enerji Effektivliyi Bazarının Qiymətləndirilməsinin ilkin nəticələri üzrə seminar keçirilib.
Seminar zamanı DB-nin nümayəndələri qeyd ediblər ki, Azərbaycanda enerji istehlakının təqribən 55%-i binaların payına düşür, bu da dünya üzrə orta göstərici olan 35%-dən xeyli çoxdur.
Vurğulanıb ki, Azərbaycanda binalarda enerji effektivliyini artırmaq üçün müxtəlif təşəbbüslər və proqramlar həyata keçirilir, lakin zəruri nəticələrə nail olmaq üçün yeni əhatəli yanaşmaya ehtiyac var.
Həmçinin, tədbirdə Azərbaycanda özəl (yaşayış və kommersiya) və ictimai binalar üçün Milli Renovasiya Proqramı üçün hazırlanan Yol Xəritəsinin əsas nəticələri, ictimai binalarda enerji effektivliyi potensialının bazar qiymətləndirilməsinin ilkin nəticələri ilə bağlı rəylər və sözügedən proqramın həyata keçirilməsi üçün ehtiyacların qiymətləndirilməsi müzakirə edilib.
Seminar Dünya Bankı tərəfindən həyata keçirilən və Avropa İttifaqı (Aİ) tərəfindən maliyyələşdirilən Azərbaycan üçün Çevik Texniki Yardım Aləti (AZTAF) proqramı çərçivəsində “Enerji effektivliyi və iqlim” texniki yardım layihəsinin icrası çərçivəsində təşkil olunub.
Enerji efektivliyi bazarının qiymətləndirilməsi Binalar Sektorunda Milli Renovasiya Proqramının işlənib hazırlanmasıməqsədilə həyata keçirilir.
Aİ və Dünya Bankının birgə səyləri olan AZTAF Proqramı “Azərbaycan 2030: sosial-iqtisadi inkişafa dair Milli Prioritetlər” üzrə inkişaf məqsədlərinə nail olmaq üçün Azərbaycan hökumətinə dəstək vermək məqsədilə yaradılıb.
