Energetika naziri Dünya Bankının nümayəndəsi ilə görüşüb

Energetika naziri Pərviz Şahbazov Dünya Bankının Azərbaycandakı ofisinin yeni təyin olunmuş ölkə meneceri Stefanie Stallmeister ilə görüşüb.

Bu haqda Energetika nazirliyinin bu gün yayadığı məlumatda bildirilir.

Söhbət zamanı Dünya Bankının texniki və maliyyə dəstəyi ilə ölkəmizdə layihələrin həyata keçirilməsi yüksək qiymətləndirilib, Bank ilə əməkdaşlıq məsələləri müzakirə edilib.

Məlumata görə, həmçinin Azərbaycanın enerji sektorunun prioritet inkişaf istiqamətləri barədə fikir mübadiləsi aparılıb.

Enerji keçidi, enerji səmərəliliyi, bərpa olunan enerji və Xəzər dənizindən Avropaya ötürülən enerji layihələri istiqamətində görülən işlər, o cümlədən Xəzər dənizində külək enerjisinin potensialının qiymətləndirilməsi barədə məlumat verilib. Görüşdə həmçinin, 2023-2028-ci illəri əhatə edən Dünya Bankı Qrupunun Azərbaycan üzrə yeni Ölkə Tərəfdaşlıq Çərçivə Sənədinin hazırlanmasına da toxunulub.