“BP-Azerbaijan” şirkəti 2023-cü ilin yanvar-sentyabr aylarında “Şahdəniz” yatağından 20 milyard kubmetr qaz hasil edib ki, bu da 2022-ci ilin müvafiq dövrünün göstəricisindən 11% çoxdur.
Bu barədə “İnterfaks-Azərbaycan” agentliyinə şirkətin mətbuat xidmətindən məlumat verilib.
Hesabat dövründə yataqdan təqribən 27 milyon barel kondensat (3 milyon tondan çox) hasil edilib ki, bu da 2022-ci ilin 9 ayının göstəricisinə uyğundur.
“Mövcud “Şahdəniz” qurğularının hasilat gücü hazırda gündə təxminən 72,1 milyon kubmetr və ya ildə 26,3 milyard kubmetrdən çoxdur”, – şirkətdən məlumat verilir.
2023-cü ilin yanvar-sentyabr aylarında “Şahdəniz” konsorsimunun yatağın işlənməsi üzrə xərcləri $2 milyard 391 milyon (artım 14,6%), o cümlədən istismar xərcləri $1 milyard 738 milyon, əsaslı xərcləri $653 milyon təşkil edib. Bu xərclərin əsas həcmi “Şahdəniz-2” layihəsinin payına düşüb.
Həmçinin, məlumat verilib ki, Cənubi Qafqaz Boru Kəməri (South Caucasus Pipeline, SCP və ya Bakı-Tbilisi-Ərzurum) ilə gündə orta hesabla 60,5 milyon kubmetr qaz (2022-ci ilin yanvar-sentyabr aylarında 56,1 milyon kubmetr) nəql olunub. Cari ilin yanvar-sentyabr aylarında SCP-nin istismar xərcləri $49 milyon təşkil edib, əsaslı xərcləri isə $4,5 milyondan çox olub.
“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları bp (operator – 29,99%), LUKOIL (19,99%), TPAO (19%), NICO (10%) və “Cənub Qaz Dəhlizi” QSC-dir (21,02%).
Hazırda “Şahdəniz” yatağından qaz hasilatı “Mərhələ-1” çərçivəsində “Alfa” və “Mərhələ-2” çərçivəsində “Bravo” platformalarından həyata keçirilir. “Şahdəniz” yatağından qaz hasilatına 2006-cı ilin dekabr ayında başlanılıb.
2022-ci ildə “Şahdəniz” yatağından 25,2 milyard kubmetr qaz (2021-ci illə müqayisədə +11,5%) və 4,4 milyon ton kondensat (+4,8%) hasil edilib.
