2022-ci ildə “Azərbaycan İstilik Elektrik Stansiyası” MMC-nin mənfəəti 4,332 milyon manat təşkil edib, bu da2021-ci ilin göstəricisi ilə müqyisədə 47,9% azdır.
“İnterfaks-Azərbaycan” agentliyinin verdiyi xəbərə görə, bu göstəricilər MMC-nin 2022-ci il üzrə maliyyə vəziyyətinə dair birləşdirilmiş hesabatında öz əksini tapıb.
Hesabata əsasən, ötən il “Azərbaycan İES” MMC tərəfindən elektrik enerjisinin satış həcmi 252,098 milyon manat (azalma 11,5%) təşkil edib.
Hesabat dövründə stansiyanın xərclərinin strukturunda yanacaq xərcləri 171,074 milyon manat (azalma 13,5%) təşkil edib.
Müəssisənin əməliyyat mənfəəti 8,686 milyon manat təşkil edib ki, bu da 2021-ci illə müqayisədə 49,2% azdır.
Ötən ilin yekunları üzrə cəmiyyətin vergi ödənilənədək mənfəəti 8,687 milyon manat (azalma 49,2%), mənfəət vergisi üzrə ödənişlər 4,355 milyon manat (azalma 50,3%) təşkil edib.
2022-ci ildə “Azərbaycan İES” MMC-nin aktivləri 4,7% – 625,465 milyon manata qədər artıb, uzunmüddətli aktivləri 4% – 477,882 milyon manata qədər, qısamüddətli aktivləri 48,1% – 147,583 milyon manata qədər azalıb.
Hesabat ilində cəmiyyətin kapitalı 0,8% – 477,609 milyon manata qədər artıb, nizamnamə kapitalı 5,108 milyon manata (dəyişməyib), ümumi bölüşdürülməmiş mənfəəti 88,946 milyon manata (artım 5,1%) bərabərdir.
2022-ci ildə cəmiyyətin öhdəlikləri 20% – 147,856 milyon manata qədər artıb.
“Azərbaycan” İES hər birinin gücü 300 MVt olan 8 blokdan ibarətdir. Azərbaycanda istehsal edilən elektrik enerjisinin 45%-ə qədəri bu stansiyanın payına düşür. Burada yanacaq kimi təbii qaz və mazutdan istifadə edilir.
