Dövlət Vergi Xidməti (DVX) “Qobu Elektrik Stansiyası” MMC-ni 522 milyon 236 min manat məbləğində nizamnamə kapitalı ilə qeydiyyata alıb.
“Cəmiyyət 2021-ci il oktyabrın 27-də dövlət qeydiyyatına alınıb. Şirkətin qanuni təmsilçisi İbrahim Məmmədovdur”, – deyə DVX-dən “İnterfaks-Azərbaycan” agentliyinə bildirilib.
Xəbər verildiyi kimi, “Azərenerji” ASC 385 MVt gücündə “Qobu” Elektrik Stansiyasının tikintisini başa çatdırıb. Hazırda obyekt test rejimində işləyir. Eyni zamanda, 330/220/110/10 kV-luq “Qobu” yarımstansiyasının tikintisi də başa çatır və bu enerji qovşağı Azərbaycanın enerji sisteminə inteqrasiya olunub.
Bu yarımstansiya 500 kV-luq “Abşeron” yarımstansiyasının əvəzedicisi funksiyasını daşımaqla 1000 MVt-dək gücü qəbul edib ötürəcək.
“Qobu” Elektrik Stansiyası və “Qobu” yarımstansiyasından ibarət olan enerji qovşağı Bakı və Abşeron yarımadasının elektrik enerjisi ilə təchizatında bir mənbədən asılılığı aradan qaldıracaq və dairəvi elektrik təchizat sxemləri ilə enerjisistemin dayanıqlı iş rejimləri təmin ediləcək.
Prezident İlham Əliyev 2020-ci il avqustun 21-də “Qobu” Elektrik Stansiyasının təməlini qoyub.
Energetika naziri Pərviz Şahbazov daha əvvəl bildirmişdi ki, elektrik stansiyasının tikintisi elektrik enerjisinə artan tələbatın ödənilməsi üçün nəzərdə tutulub. Stansiyanın 2022-ci ilin əvvəlində istifadəyə verilməsi planlaşdırılır.
interfax.az
