İndiyə qədər şirkətin baş icraçı direktoru vəzifəsində çalışan Qəhrəmanov SOCAR prezidentinin müşaviri vəzifəsinə təyin edilib
“SOCAR Turkiye Enerji” şirkətinin (SOCAR-ın Türkiyədəki törəməsi) baş direktoru dəyişib. Bu barədə SOCAR-ın mətbuat xidmətindən məlumat verilib.
“SOCAR Turkey Refining and Petrochemical Business Unit”in (“SOCAR Turkiye Enerji”nin neft emalı və neft-kimya üzrə vahidi) baş maliyyə direktoru (CFO) Elçin İbadov “SOCAR Turkiye Enerji” şirkətinin baş direktoru vəzifəsinə təyin olunub. İbadov bu vəzifədə Zaur Qəhrəmanovu əvəz edib”, – məlumatda deyilir.
Şirkətin məlumatına əsasən, 2016-cı ildən “SOCAR Turkiye Enerji”nin baş icraçı direktoru vəzifəsində çalışan Qəhrəmanov SOCAR prezidentinin müşaviri vəzifəsinə təyin edilib.
Elçin İbadov Çikaqo İllinois Universitetindən məzun olduqdan sonra 2002-ci ildə Çikaqoda Dünya Ticarət Mərkəzində araşdırma mütəxəssisi olaraq əmək fəaliyyətinə başlayıb. 2003-cü ildən etibarən 11 il müddətində “PwC” şirkətində müxtəlif məsul vəzifələrdə çalışdıqdan sonra 2014-2019-cu illər arasında “STAR Oil Refinery” (NEZ) zavodunda maliyyə direktoru və CFO vəzifələrində fəaliyyətini davam etdirib. 2019-cu ilin noyabr ayından etibarən “Petkim”də, həmçinin STAR NEZ, “Petkim”, “SOCAR Depolama” və “SOCAR Petrol Ticaret” şirkətlərini əhatə edən Neft emalı və neft-kimya biznes vahidində baş maliyyə direktoru vəzifəsini icra edib. İbadov iqtisadiyyat, mühasibatlıq, maliyyə, beynəlxalq maliyyə hesabatları standartları və maliyyə auditi mövzularında bir neçə dərsliklərin müəllifi, ACCA, ACFE və IIA kimi beynəlxalq maliyyə və audit təşkilatlarının daimi üzvüdür.
“SOCAR Turkiye Enerji” 2006-cı ilin sonunda Türkiyədə neft emalı, neft-kimya və təbii qaz ticarəti sahəsində investisiya layihələrinin həyata keçirilməsi məqsədilə yaradılıb.
Şirkət “Petkim Petrokimya Holding”in nəzarət səhm paketinin (51%) sahibidir. “STAR” neft emalı zavodu, konteyner terminalı və elektrik stansiyasının inşasını həyata keçirmiş şirkət, həmçinin daxili bazara da qaz tədarük edir.
