“Azəri-Mərkəzi-Şərqi” platformasının dayaq bloku dənizə yola salınmağa hazırdır

Azərbaycan prezidenti İlham Əliyev çərşənbə axşamı “Azəri-Mərkəzi-Şərqi” platformasının dayaq blokunun dənizə yola salınması mərasimində iştirak edib. Bu barədə dövlət baçısının saytında məlumat verilir.

Dayaq bloku “Azəri-Mərkəzi-Şərqi” layihəsi çərçivəsində Heydər Əliyev adına Bakı dərin özüllər zavodunda inşa olunub.

Dayaq blokunun hündürlüyü 153 metr, qovuqların ümumi çəkisi isə 9 min ton təşkil edəcək.

BP şirkəti 2023-cü ilin sonuna yaxın “Mərkəzi Şərqi Azəri” layihəsi çərçivəsində ilk neftin hasilatına başlamağı ümid edir.

Hazırda “AÇG” blokunda 6 hasilat platforması fəaliyyət göstərir. AMŞ layihəsi AÇG yataqlar blokunun işlənməsinin növbəti mərhələsidir.

Layihə çərçivəsində 48 quyunun qazılması planlaşdırılır. Bu işləri TURAN Drilling Company birgə müəssisəsi həyata keçirəcək.

Bu layihənin məqsədi əlavə quyular qazmaqla və əlavə dəniz obyektləri quraşdırmaqla, gündə 100 min barelə qədər neft və 350 min standart kubfut qaz təşkil edən pik hasilat həcminə nail olmaqdır.

19 aprel 2019-cu il tarixində “Azəri-Çıraq-Günəşli” yataqlar blokunun işlənməsi layihəsinin səhmdarları “Mərkəzi Şərqi Azəri” layihəsi üzrə yekun investisiya qərarı imzalayıblar. Layihənin dəyəri $6 milyard təşkil edir. Bunun təxminən $3,2 milyardı tikinti işlərinə xərclər, qalanı – yeni quyuların qazılması daxil olmaqla, işlənmə xərclərinin payına düşür.

Layihə suyun 137 metr dərinliyində, “Mərkəzi Azəri” və “Şərqi Azəri” platformaları arasında yerləşdiriləcək yaşayış bloklu hasilat və qazma platformasının tikintisini nəzərdə tutur. “Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb.

Blokda neft hasilatına 1997-ci ilin noyabr ayında başlanılıb. Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun işlənməsi haqqında 2050-ci ilədək olan dövrü əhatə edən yeni müqavilə imzalanıb.

Yeni müqavilə üzrə BP (Britaniya – layihənin operatoru) 30,37%, SOCAR 25%, “MOL” (Macarıstan) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, “ITOCHU Oil” (Yaponiya) 3,65%, “Equinor” (Norveç) 7,27%, TPAO (Türkiyə) 5,73% pay sahibidir.

2021-ci ildə AÇG blokundan 167 milyon barelə yaxın neft (2020-ci illə müqayisədə azalma 4,6%) hasil edilib.

İnterfax-Azərbaycan