Azərbaycan Dövlət Neft Şirkəti (SOCAR) Naftalan rayonunda yeni neft quyuları qazmağı planlaşdırır.
“Report” xəbər verir ki, bunu şirkətin vitse-prezidenti Xalik Məmmədov Naftalanda keçirilən “Naftalan – Sağlamlıq və Turizmin Sinerji Mənbəyi. Regionda Yeni Reallıqlar” beynəlxalq elmi-pratik konfransında bildirib.
“Naftalan neftinin əhəmiyyətini nəzərə alaraq yatağın perspektivinin gücləndirilməsi üçün prezidentin tapşırığı ilə şirkətimiz xüsusi proqram hazırlayıb. Həmin proqramla yeni quyuların qazılması nəzərdə tutulur. İlk belə quyunun 2023 cü ildə 3,5 min dərinlikdə qazılması nəzərdə tutulub”, – deyə o, qeyd edib.
X.Məmmədovun sözlərinə görə, Naftalan neft yatağının ilkin balans ehtiyatı 1,165 milyon ton, ilkin çıxarıla bilən ehtiyatı isə 117 min ton həcmində qiymətləndirilib. Bunun da 52%-i mənimsənilib. Hazırda qalıq balans ehtiyatı 1,109 milyon ton, qalıq çıxarılan bilən ehtiyat isə 61 min tondur. Burada quyuların sayı 94, istismarda olan quyuların sayı isə 32-dir.
Caspian Barrel-in arayışı: “Naftalan” yatağı Azərbaycanın paytaxtı Bakı şəhərindən 320 km, Gəncə şəhərindən 50 km cənub-şərqdə yerləşir.
Arxiv məlumatlarına görə, 1873-cü ilə qədər burada neft dayaz quyulardan əllə hasil edilirdi. 1890-cı ildə alman mühəndis-konsessioneri E.İ.Yeger “Naftalan” yataqlarında torpaq sahəsi alaraq sənaye neftinin çıxarılması üçün 250 metr dərinlikdə ilk quyuları qazır. Ancaq nefti emal edən zaman mütəxəssis çox məyus oldu: neftdə benzin fraksiyaları demək olar ki, yox idi və yanmırdı.
Alman mühəndis müxtəlif yerlərdən gələn yüzlərlə insanın isti yay günlərində bu neftlə dolu çuxurlara daxil olduğunu müşahidə edir. “Naftalan” yatağından çıxan neftin dərman vasitəsi kimi geniş istifadə olunduğunu görən və bu maddə ilə müalicə təcrübəsini yerli əhalidən götürərək Yeqer qısa müddətdə böyük şöhrət qazanan naftalan məlhəmi istehsalı üçün fabrik tikir. Bu fabrikin məhsulları, eləcə də onun istehsal olunduğu xammal Almaniyaya ixrac olunmağa başladı. 1986-cı ildən burada naftalan neftindən dərmanlar istehsal edən iki “Naftalan Maqdeburq” və “Naftalan Drezden” səhmdar cəmiyyətləri fəaliyyətə başlayır. Yeger məlhəmlərinin hazırlanması üsullarını tam məxfi saxlayır və onun istehsalını monopoliyaya almışdı.
1920-ci ildən “Naftalan” yatağı Sovet hökumətinin yurisdiksiyasına keçdi və mühafizə zonası elan edildi. Yataq zonasında 1926-cı ildən SSRİ-nin hər yerindən xəstələrin müalicə olunduğu “Naftalan” ixtisaslaşmış kurortu fəaliyyətə başlayır və bu gün də fəaliyyətdədir.
Naftalan şəhərində dünyada yeganə olan, təxəyyülü heyrətləndirən “Qoltuqağacı muzeyi” yerləşir. Burada müxtəlif dizayn və ölçülərdə yüzlərlə qoltuqağacı görmək mümükündür. Onlar istirahət mərkəzinə gələrkən qoltuqağacıların köməyi olmadan hərəkət edə bilməyən insanlar tərəfindən hədiyyə edilmişlər, çünki Naftalan neftindən istifadə etdikdən sonra buranı qoltuqağacılara ehtiyac olmadan tərk etmişlər.
