Azərbaycan Respublikası Dövlət Gömrük Komitəsinin bəyan etdiyi statistikadan çıxış etsək, 1000 kubmetr qazın fevral ayında orta ixrac qiyməti $715,98 təşkil edib.
2022-ci ilin yanvar-fevral aylarında Azərbaycan Dövlət Gömrük Komitəsi ölkədən 3 milyard 963 milyon 666,71 min kubmetr təbii qazın ixrac edildiyini bəyan edib.
Hesabat dövründə Azərbaycanın ixrac qazının bəyan edilmiş dəyəri $2 milyard 486 milyon 160,26 min təşkil edib. Yəni Komitənin bu məlumatından çıxış etsək, məlum olar ki, 2022-ci ilin ilk iki ayında Azərbaycan öz qazının hər min kubmetrini ortala olaraq 627 dollar 24 sentdən ixrac edib.
Maraqlı bir detal isə ondan ibarətdir ki, Gömrük Komitəsi Azərbaycanın qaz gəlirlərinin artıq ölkənin ümumi ixracatında 41,66%-ə qədər yüksəldiyini göstərib. Yanvar ayında bu göstərici 26,02% olmuşdu (qazın $497,95 orta ixrac qiymətində).
Gömrük Komitəsinin açıqladığı məlumatlardan belə qənaətə gəlmək olar ki, 2022-ci ilin fevral ayında Azərbaycan qaz ixrac həcmlərini kəskin artıraraq 2 mlrd 350 mln 466,89 min kubmetrə çatdırıb. Baxmayaraq ki, fevralda 28 gün var, bəyan edilmiş həcmin miqdarı yanvarın 31 günü ilə müqayisədə 1,46 dəfə artıb.
2022-ci ilin fevralında ixrac edilmiş qaz gəlirləri 1 mlrd 682 mln 858,75 min dollar təşkil edib. Yəni 1000 kubmetr qazın ixrac qiyməti $715,98-a qədər artıb. Başqa sözlə, fevralda Azərbaycan öz qazını yanvarla müqayisədə həcm etibarı ilə 45,7% və dəyər ifadəsində isə 43,78% artırıb.
Caspian Barrel bildirir ki, Gömrük Komitəsi Azərbaycan qazının ixrac coğrafiyasını dərc etməyib. Azərbaycan hazırda öz qazını 5 ölkəyə: Gürcüstan və Türkiyə kimi qonşu ölkələrə və Bolqarıstan, Yunanıstan və İtaliya olmaqla Avropa ölkələrinə ixrac edir.
Azərbaycan energetika nazirliyinin məlumatlarına görə, ölkənin qaz satışının təqribən yarısı Avropa ölkələrində həyata keçirilir. Avropa bazarında isə qaz daha bahadır, nəinki regional bazarda. Bu baxımdan cari ildə Azərbaycan qazının Avropa bazarında qiyməti Gömrük Komitəsinin açıqladığı orta qiymətdən kifayət qədər baha olmalıdır.
İlham Şaban
