“BP-Azerbaijan” şirkəti 2021-ci ilin yanvar-sentyabr aylarında “Şahdəniz” yatağından 16 milyard kubmetr qaz hasil edib ki, bu da 2020-ci ilin müvafiq dövrünün göstəricisindən 20,3% çoxdur. Bu barədə “İnterfaks-Azərbaycan” agentliyinə şirkətin mətbuat xidmətindən məlumat verilib.
Cari ilin yanvar-sentyabr aylarında “Şahdəniz” yatağından təxminən 24 milyon barel kondensat (3 milyon ton) hasil edilib ki, bu da ötən ilin müvafiq dövrünün göstəricisindən 11,1% çoxdur.
“Hazırda yatağın hasilat gücləri gündəlik təxminən 70 milyon kubmetr və ya illik 25 milyard kubmetrdən çoxdur”, – deyə məlumatda bildirilir.
Bu dövrdə “Şahdəniz” konsorsiumunun yatağın işlənməsi üzrə xərcləri $2 milyard 94 milyon (artım 56,4%), layihə üzrə istismar xərcləri $1 milyard 570 milyon, əsaslı xərclər $524 milyon təşkil edib. Əsaslı xərclərin böyük həcmi “Şahdəniz-2” layihəsi üzrə işlərin payına düşüb.
9 ay ərzində Cənubi Qafqaz Boru Kəməri (CQBK) ilə gündəlik 46,8 milyon kubmetr qaz (2020-ci ilin yanvar-sentyabr aylarında 32,6 milyon kubmetr) nəql olunub. Hesabat dövründə CQBK üzrə istismar xərcləri $39 milyon, əsaslı xərclər $8 milyon təşkil edib.
Xəbər verildiyi kimi, 2020-ci ildə “BP-Azerbaijan” şirkəti “Şahdəniz” yatağından 18,1 milyard kubmetr qaz (artım 7,7%) və 3,6 milyon ton kondensat (artım 2,8%) hasil edib.
“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları BP (operator – 28,8%), “Petronas” (15,5%), SOCAR (16,7%), LUKOİL (10%), NICO (10%) və TPAO (19%) şirkətləridir.
Hazırda “Şahdəniz” yatağından qaz hasilatı “Mərhələ-1” çərçivəsində “Alfa” və “Mərhələ-2” çərçivəsində “Bravo” platformalarından həyata keçirilir.
