Türkiyədə “Merkuri” neft-kimya kompleksinin inşasına dair son investisiya qərarı 2022-ci ildə veriləcək.
“Report”un məlumatına görə, bunu Azərbaycan Dövlət Neft Şirkətinin (SOCAR) Sərmayələr İdarəsinin rəisi, “SOCAR Turkey Enerji” və “Petkim Holding”in İdarə Heyəti sədrinin müavini Vaqif Əliyev jurnalistlərə açıqlamasında bildirib.
V. Əliyev xatırladıb ki, daha əvvəl şirkət bu layihəni BP şirkəti ilə müzakirə edib, lakin Böyük Britaniya şirkətinin neft-kimya sənayesindən çəkilib: “Biz “INEOS” və BP-nin neft-kimya aktivlərini əldə etmiş digər investorlarla danışıqlar aparırıq. Əlbətdə ki, Türkiyədəki ikinci neft-kimya sərmayəmiz olacaq “Merkuri” layihəsinin icrasındakı uzunmüddətli gecikməni qəbul etmirik. Bu investisiyanı ya neft-kimya sənayesində təcrübəsi olan bir ortağımızla, ya da maliyyə ortağımızla həyata keçirəcəyik. Bu yaxınlarda ikinci bir variantı nəzərdən keçirdik. Yəni maliyyə tərəfdaşı ilə görüşmək üçün qərar qəbul etdik”.
Xatırladaq ki, 2021-ci ilin yanvarında “INEOS” BP-dən aromatik və asetil istehsalı üzrə biznesini almaq üçün müqavilə imzalayıb. Müqavilənin dəyəri 5 milyard ABŞ dolları idi. Aktivə ABŞ-da 5, Asiyada 8 və Avropada 2 olmaqla 15 istehsal sahəsi və 10 aparıcı birgə müəssisə daxildir.
Qeyd edək ki, Türkiyənin Rəqabət Şurası 2020-ci ilin iyun ayında SOCAR və BP-yə ortaq bir neft-kimya müəssisəsi yaratmağa icazə verib. “Merkuri” kompleksi “Petkim” neft-kimya kompleksi və STAR neft emalı zavodunun yanında inşa ediləcək. Layihənin dəyəri 1,8 milyard ABŞ dolları dəyərində qiymətləndirilir və 50/50 faiz pay bögüsünə malikdir.
