“Azərbaycan Dövlət Neft Şirkətinin (SOCAR) hazırda 2011-ci ildə hazırlanmış “SOCAR-ın 2025-ci ilə kimi strateji inkişafına dair Kompleks Planı” əsasında fəaliyyət göstərir. Bu strategiyanın icrası ilə bağlı hər il SOCAR-ın Davamlı İnkişaf Hesabatı şirkətin internet səhifəsində açıqlanır”
Bunu “Report”a açıqlamasında SOCAR-ın İctimaiyyətlə Əlaqələr və Tədbirlərin Təşkili İdarəsinin rəis müavini İbrahim Əhmədov son günlər bəzi KİV-də SOCAR-ın inkişaf strategiyasının olmaması ilə bağlı iddiyaya cavab olaraq bildirib.
Belə ki, bəzi KİV-lər iddia edirlər ki, bir çox neft şirkətləri artıq 2025 və 2030-cu illərə qədər öz strategiyalarını qəbul ediblər, lakin SOCAR hələ bunu etməyib. İddia olunur ki, SOCAR hazırda heç bir strategiya qüvvədə olmadan fəaliyyət göstərir.
Bu iddianın nə dərəcədə doğru olduğuna cavab verən İ. Əhmədovun sözlərinə görə, ümumiyyətlə, 2005-ci ildən etibarən şirkət müvafiq strateji inkişaf planları əsasında fəaliyyət göstərir: “İlk strategiya 2005-2010-cu illəri əhatə edib. Daha sonra 2011-ci ildə 2025-ci ilə qədər görüləcək əsas işləri özündə ehtiva edən strategiya dünyanın bu sahədə aparıcı şirkətlərindən biri olan “Ernst&Young”ın iştirakı ilə hazırlanıb. Hər il ictimaiyyətə açıqlanan Davamlı İnkişaf Hesabatları da, SOCAR-ın digər hesabatları kimi “Ernst&Young” tərəfindən audit olunur”.
O qeyd edib ki, SOCAR-ın 2025-ci ilədək strategiyasının hələ qüvvədə olduğuna baxmayaraq, Dördüncü Sənaye İnqilabının təsirini, dünya iqtisadiyyatının sürətlə dəyişdiyini və qlobal rəqabətlə ayaqlaşmaq zərurətini nəzərə alaraq, SOCAR artıq yeni strategiyasını da hazırlayıb: “Daha əvvəl bu haqda məlumat da vermişdik. Bu işə dünyanın digər aparıcı məsləhətçi şirkəti “McKinsey” cəlb olunub”.
SOCAR rəsmisi vurğulayıb ki, 2025-ci ilə qədər strategiyanın mövcudluğunu və onun əsasında 2035-ci ilədək yeni strategiya üzərində işlərin aparılmasının əhəmiyyətini SOCAR-ın prezidenti də ötən il dərc olunmuş Davamlı İnkişaf Hesabatının ön sözündə vurğulamışdı: “Ümumiyyətlə, şirkətin inkişaf strategiyası ilə bağlı müxtəlif qeydlər SOCAR-ın açıqlamalarında dəfələrlə yer alıb. Odur ki, bu cür iddiaları irəli sürməkdən əvvəl SOCAR-ın ictimaiyyətə açıq olan hesabatları və digər açıqlamaları ilə tanış olmaq məqsədəuyğun olardı”.
İ. Əhmədov qeyd edib ki, 2035-ci ilə qədər dövrü əhatə edən SOCAR-ın yeni davamlı inkişaf strategiyasının layihəsi artıq ötən il hazırlanıb və hökumətə təqdim edilib: “Hazırda layihəyə baxılır. Yeni strategiya təsdiqləndikdən sonra onun əsas məzmunları haqqında ictimaiyyətə də məlumat veriləcək. Ona qədər isə şirkət daha əvvəl qəbul edilmiş və 2025-ci ilə qədər dövrü əhatə edən strateji inkişaf planı çərçivəsində fəaliyyət göstərir”.
