“Azəristiliktəchizat” ASC-nin 2019-cu il üçün təsdiq edilib istehsal və maliyyə təsərrüfat planlarına uyğun olaraq istilik təchizatı obyektlərinin 2019-2020-ci illər payız-qış mövsümünə hazırlığı mövcud qazanxana, istilik şəbəkələri, nəzarət ölçü cihazları və avtomatika, qaz, elektrik, nəqliyyat təsərrüfatları və digər istehsal təyinatlı avadanlıqların mövsümə hazırlanması ilə bağlı təsdiq edilib tədbirlər planı çərçivəsində 970,3 km istilik xətləri hidravliki təzyiqə yoxlanılıb və yuyulub, 26 958 m məhəllədaxili və magistral istilik xətləri əsaslı təmir olunub.
Bu barədə “Report”a Energetika Nazirliyindən məlumat verilib.
Bildirilib ki, 5 165 km istilik kəməri təmirdən sonra hidravlik təzyiqə yoxlanılıb, 533 qazanxana və 90 istilik məntəqəsi kompleks yoxlanılib, istilik xətlərində 9 489 m2 istilik örtük qatı təmir olunub, 1 963 ədəd istilik kamerası təmizlənib və təmir olunub, gedən və qayıdan xətlərdə 66 dəst su sərfölçən həlqələr təmir və bərpa olunub, 930 ədəd qazan aqreqatı əsaslı və cari təmir olunub, 531 ədəd odluq təmir olunub. 1 190 ədəd qazan aqreqatı mexaniki və kimyəvi üsulla təmizlənib, 533 ədəd qazanda yeraltı və yerüstü tüstü yolları təmizlənib, qazanların 924 m2 kərpic örtüyü, 1 755 m2 izolyasiya örtüyü təmir olunub.
Qazanxana və istilik məntəqələrində 33 804 m2 tavan və divarlar təmir olunub və rənglənib, 8 521 m2 dam örtüyü təmir edilib, 863 m2 pəncərə təmir olunaraq şüşələnib. 438 dəst istilik mübadilə qurğusu mexaniki və kimyəvi üsulla təmizlənib, 590 ədəd kimyəvi su yumşaltma qurğuları işə hazırlanaraq tənzimlənib və Na-kationit süzgəclərində 34,3 ton kationit materialları dəyişdirilibdir. 1 599 ədəd nasos əsaslı və cari təmir olunub, 7 ədədi isə yenisi ilə əvəz olunub. 10 147 ədəd siyirtmə əsaslı və cari təmir olunub, 292 ədəd isə yenisi ilə əvəz olunub, 1 487 ədəd dirsək dəyişdirilibdir. 559 ədəd mühərrik əsaslı və cari təmir olunub, 17 ədədi isə yenisi ilə əvəz olunub. Qazanxanalarda və istilik məntəqələrində 25 ədəd tüstüsoran, 73 ədəd havavuran, 2 ədəd deorator qurğusu təmir olunub. 1 092 ədəd genişlənmə çəni təftiş olunub, onlardan 569 ədədinin təzyiqi tənzimlənib, 105 ədəd rezin membran dəyişdirilibdir. 1 893 ədəd qoruyucu klapan və 2 246 ədəd əks klapan təftiş və təmir olunub. 7 064 ədəd ventil təftiş olunub, onlardan 2 769 ədədi təmir olunub, 479 ədədi isə yenisi ilə əvəz olunub. 516 ədəd ehtiyat su çəni təftiş və təmir olunub, 2 970 ədəd çirktutan təmizlənibdir. 533 qazanxanada qaz təsərrüfatı avadanlıqları təftiş olunub, 151 km yerüstü və yeraltı qaz xəttinə baxış keçirilib və yoxlanılıbdır.
Hesabat dövründə “Azəristiliktəchizat” ASC-də 1 mln 448,7 min Qkal istilik enerjisinin istehsalına 202,6 mln kubmetr qaz sərf olunub.
