2020-ci ildə Azərbaycanda neft hasilatı 36,49 milyon ton həcmində proqnozlaşdırılır. Bu barədə “İnterfaks-Azərbaycan” agentliyinə energetika nazirinin müşaviri, nazirliyin mətbuat xidmətinin rəhbəri Zəminə Əliyeva məlumat verib.
“Cari ildə neft hasilatında hədəf əvvəlki kimi onun stabilləşməsinə yönəlib, qaz hasilatında isə əhəmiyyətli artım gözləyirik. Proqnozlara görə, bu il Azərbaycanda 36,49 milyon ton neft və 38,4 milyard kubmetr qaz hasil olunacaq”, – deyə o qeyd edib.
Daha əvvəl Dövlət Statistika Komitəsindən verilən məlumata görə, 2019-cu ildə respublikada 37 milyon 517,6 min ton neft və 35 milyard 591,4 milyon kubmetr qaz hasil edilib.
Beləliklə, 2020-ci ildə Azərbaycan üzrə neft hasilatı 2,7% azalacaq, qaz hasilatı 7,9% artacaq.*
