2016-2017-ci illərdə Böyük Britaniya hökuməti Azərbaycanda “OIL and GAS High Value Campaign” (HVC) proqramının reallaşdırılması çərçivəsində 1,3 milyard funt sterlinq vəsait sərf edib.
AZƏRTAC xəbər verir ki, bu barədə Böyük Britaniya Beynəlxalq Ticarət Departamentinin Azərbaycanda fəaliyyət göstərmək niyyətində olan şirkətlər üçün hazırladığı “Overseas Business Risk – Azerbaijan” hesabatında deyilir.
“Neft-qaz Azərbaycan iqtisadiyyatının ən böyük sektorudur və buna görə də Böyük Britaniya Beynəlxalq Ticarət Departamentinin diqqətini cəlb edir. Azərbaycan HVC proqramının ən uğurla həyata keçirildiyi ikinci ölkədir. 2015-ci ilin oktyabrından bu proqramın dəstəklənməsi üçün Beynəlxalq Ticarət Departamenti Azərbaycanın İqtisadiyyat Nazirliyi, BP və SOCAR şirkətləri ilə birgə Böyük Britaniya və Azərbaycan arasında Tərəfdaşlıq Proqramını həyata keçirir. Tərəfdaşlıq Proqramı çərçivəsində indiyədək 65 tərəfdaş sazişi imzalamaq mümkün olub. Proqram növbəti 3-5 ildə də davam edəcək”, – deyə hesabatda qeyd olunur.
Bildirilir ki, 2017-ci il sentyabrın 14-də BP SOCAR və digər tərəfdaşlarla birgə “Azəri-Çıraq-Günəşli” yataqlar bloku üzrə yeni hasilatın pay bölgüsü Sazişi imzaladılar və mövcud sazişin müddəti 2050-ci ilədək uzadıldı. Bu saziş Azərbaycanın neft-qaz sektorunda fəaliyyət göstərən və yeni əməkdaşlıqda maraqlı olan Britaniya şirkətləri üçün əhəmiyyətli biznes əlaqələrinin qurulmasına gətirib çıxaracaq. Digər əsas müqavilələr isə boru kəmərinə aiddir. Neft-qaz sektoru ilə yanaşı Beynəlxalq Ticarət Departamenti Azərbaycanda səhiyyə, təbii ehtiyatların hasilatı, bərpaolunan enerji, kənd təsərrüfatı, turizm və təhsil səviyyəsində iştirakda maraqlıdır.
