Rusiya hökuməti 2023-cü ildə qaz kəmərləri ilə və mayeləşdirilmiş formada Rusiya qazının ixracı ilə bağlı hesablamaları yeniləyib və göstəriciləri artırıb – yeni rəqəmləri Federasiya Şurasında Rusiya Baş nazirinin müavini Aleksandr Novak təqdim edib.
Novakın təqdimatına görə, 2023-cü ildə boru kəməri ilə qaz ixracı 99,6 milyard kubmetr təşkil edib. İki həftə əvvəl Novakın “Enerji siyasəti” jurnalındakı məqaləsində 91,4 milyard kubmetr rəqəmi göstərilmişdi.
Qeyd edək ki, yenilənmiş rəqəm Rusiya Federasiyasının ortamüddətli Makroiqtisadi proqnoz göstəricilərini də üstələyib – 97 milyard kubmetr.
2021-ci ildə boru kəməri ilə Rusiya qazının ixracı 206,8 milyard kubmetr təşkil etmişdi, 2022-ci ildə bu göstərici 142,1 milyard kubmetrədək azaldı.
Novak qeyd edib ki, ixrac tədarükündə ən böyük azalma 2022-ci ildə “Şimal axını” qaz kəmərində təxribat səbəbindən baş verib və 2023-cü ili Rusiya qaz sənayesində sabitləşmə ili adlandırıb.
Rəsmilər Rusiya Federasiyasında hasil edilən qazın ixracı ilə bağlı məlumatlardan istifadə edir, “Qazprom”-un statistikasına isə Mərkəzi Asiya qazının təkrar ixracı da daxildir.
Novakın yeni təqdimatına görə, LNG (maye qaz) ixrac tədarükü 2023-cü ildə 45,4 milyard kubmetr təşkil edib (2022-ci illə müqayisədə 1,9% azalma – 46,3 mlrd. kubmetr).
