“Maliyyə-iqtisadi blokun rəhbəri kimi mənə “Qazprom” qrupunun maliyyə-təsərrüfat fəaliyyətinin səmərəliliyini artırmaq, müəyyən edilmiş bütün sahələrdə sabitliyi təmin etmək və blokun çaliyyə şəffaflığını təmin etmək tapşırılıb”, deyə TOP menecer vəzifəyə qoşulduqdan sonra təyinatını şərh edib.
Caspian Barrel bu barədə məlumatı Rusiyanın “İnterfaks” agentliyinə istinadən xəbər verir.
Famil Kamil oğlu Sadıqov 1968-ci il martın 3-də Naxçıvan şəhərində anadan olub. O, Rusiya Federasiyası Dövlət İdarəetmə Akademiyasını “avtomobil nəqliyyatının iqtisadiyyatı və menecmenti” ixtisası üzrə və Ümumrusiya Vergi Akademiyasını bitirib. İqtisad elmləri namizədidir.
Famil Sadıqov 2019-cu ilin aprelində “Qazprom”da işə başlamazdan əvvəl 10 il “Qazprombank”ın İdarə Heyəti sədrinin müavini vəzifəsində çalışıb, burada vergi uçotu və təhlili, daxili audit, VİP müştəri xidmətləri, habelə xeyriyyə və sponsorluq proqramı ilə bağlı departamentlərə rəhbərlik edib. Yəni kredit təşkilatının faktiki olaraq bütün əsas pul vəsaitlərinin hərəkəti Sadıqovun nəzarəti altında olub.
Sadıqovun karyerasına ancaq həsəd aparmaq olar. 27 yaşında (1995-ci ildə) o, artıq Rusiya Federasiyası Hökumətinin maliyyə nazirinin birinci müavini Vitali Artyuxovun müşaviri olub.
1996-cı ildə Sadıqov Rusiya Dövlət Vergi Xidmətinin proqnozlaşdırma və analitik şöbəsinin müdirinə məsləhət verib.
1997-1998-ci illərdə (yəni 30 yaşına çatmamış) Rusiyanın Federal Yol Xidmətində “Dorinvest magistrallarının bərpası və saxlanması” layihəsinə rəhbərlik edən direktor müavini vəzifəsini tutub.
Bundan sonra (31 yaşında) o, Rusiya Federasiyasının vergilər və rüsumlar nazirinin müavini təyin edilib və beş il bu vəzifədə çalışıb.
2005-ci ildən “Qazprombank”a işə başlayana qədər Famil Sadıqov Federal Xəzinədarlıq rəhbərinin müavini olub.
