Rusiya Federasiyası baş nazirinin müavini Aleksandr Novak Azərbaycanın iqtisadiyyat naziri, SOCAR-ın Müşahidə Şurasının sədri Mikail Cabbarov ilə iki ölkənin neft-qaz, elektrik enerjisi sahələrində əməkdaşlığının genişləndirilməsini və bərpa olunan enerji mənbələrinin inkişafını müzakirə edib.
“Azərbaycanla əməkdaşlığı genişləndirməyə hazır olan Rusiyanın ən iri neft-qaz konsernləri işləyir. Xüsusilə, Rusiya karbohidrogenlərinin Azərbaycan güclərində emalı və tranziti istiqamətində bir sıra yeni təşəbbüslər mövcuddur. Vəzifəmiz – səylərimizi birləşdirməkdir”, – RF hökumətinin saytında Novakın sözlərindən sitat gətirilir.
Belə ki, danışıqların gündəliyinə Rusiyanın neft-qaz şirkətlərinin Azərbaycan ərazisində yeni hasilat layihələrində iştirakı, onların ölkədə yanacağın satışı üzrə biznesinin miqyasının genişlənməsi, o cümlədən Tixoretsk-Bakı neft kəməri vasitəsilə Rusiya neftinin təkrar tədarükünün artırılması məsələləri daxildir.
Həmçinin, məlumatda deyilir ki, Rusiya və Azərbaycan şirkətləri arasında idxalın əvəzlənməsi siyasəti çərçivəsində texnoloji əməkdaşlığın qurulması perspektivləri müzakirə olunub.
Interfaks-Azərbaycan
