Cənub Qaz Dəhlizinin genişləndirilməsi Alp dağlarından keçəcək yeni boru kəmərinin imkanları nəzərə alınmaqla genişləndirilə bilər.
Trend-in cümə axşamı verdiyi məlumata görə, bunu Almaniya kansleri Olaf Şolts Berlində İtaliyanın baş naziri Giorgia Meloni ilə birgə mətbuat konfransı zamanı deyib.
“Cənub Qaz Dəhlizinin genişləndirilməsi xüsusilə vacibdir. Alp dağlarından keçən yeni boru kəməri ilə biz hər iki ölkə üçün enerji təchizatının təhlükəsizliyini yaxşılaşdıra bilərik”.
Qeyd edək ki, Cənub Qaz Dəhlizi Azərbaycan qazının Avropaya nəqlinə 2020-ci il dekabrın 31-dən başlayıb. Xəzər dənizi regionundan qazı Gürcüstan və Türkiyə vasitəsilə Avropa ölkələrinə nəql edir.
Cənub Qaz Dəhlizi infrastrukturu ilə 2022-ci ilin yekunlarına görə Avropaya 11,4 milyard kubmetr Azərbaycan qazı nəql edilib.
2027-ci ilə Cənub Qaz Dəhlizinin buraxıcılıq qabiliyyətinin iki dəfə artırılması planlaşdırırlır.
2022-ci ilin iyulunda Azərbaycan və Aİ CQC vasitəsilə qaz tədarükünün həcmini 2027-ci ilə qədər hazırkı 10 milyard kubmetrdən 20 milyard kubmetrə çatdırmaq barədə razılığa gəliblər.