“SOCAR Methanol” MMC 2023-cü ilin yanvar-sentyabr aylarında 350,1 min ton metanol istehsal edib ki, bu da 2022-ci ilin 9 ayının göstəricisindən 13% azdır.
Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.
2023-cü il oktyabrın 1-nə olan vəziyyətə görə, müəssisənin anbarlarında 32,9 min ton hazır məhsul var.
Dövlət Gömrük Komitəsinin məlumatına görə, 2023-cü ilin yanvar-sentyabr aylarında “SOCAR Methanol” $65 milyon 718,65 min dəyərində (azalma 36,8% – İF) 343 min 681,8 ton metanol (azalma 6,8% – İF) ixrac edib. Hesabat dövründə ixracın ümumi həcmində metanolun payı 0,25%, qeyri-neft məhsullarının ixrac həcmində 2,7% təşkil edib.
2022-ci ildə “SOCAR Methanol” 534,5 min ton metanol (artım 41,4%) istehsal edib. 2023-cü il yanvarın 1-nə olan vəziyyətə görə, müəssisənin anbarlarında 35 min ton hazır məhsul olub. “SOCAR Methanol” 2022-ci ildə $131 milyon 932,78 min dəyərində 504 min 333,93 ton metanol ixrac edib.
Bakı şəhərinin Qaradağ rayonunda yerləşən Metanol zavodu “AzMeCo” şirkəti tərəfindən inşa edilib. Zavodun inşasına $500 milyona yaxın sərmayə qoyulub. Zavodun illik istehsal gücü 720 min ton metil spirti təşkil edir.
SOCAR məhkəmənin qərarı ilə Azərbaycan Beynəlxalq Bankından alınaraq “Aqrarkredit” QSC-nin sərəncamına verilmiş müəssisəni sonuncudan 810 milyon manata əldə edib.
