Mayın 2-də Brüsseldə Azərbaycan və Avropa İttifaqı (Aİ) arasında enerji dialoqu keçiriləcək. Bu barədə bu gün Avropa Komissiyasının enerji üzrə Baş Direktoratlığından məlumat verilib.
“Mayın 2-də Brüsseldə Avropa Komissiyasının enerji məsələləri üzrə komissarı Kadri Simson və Azərbaycanın energetika naziri Pərviz Şahbazovun iştirakı ilə Aİ-Azərbaycan enerji dialoqu keçiriləcək”, – deyə məlumatda bildirilir.
Brüsseldə tərəflər Aİ ilə Azərbaycan arasında enerji sahəsində əməkdaşlığın nəticələrinə yekun vuracaq, qaz təchizatı ilə bağlı vəziyyəti, Cənub Qaz Dəhlizinin (CQD) genişləndirilməsini, “təmiz enerji”yə keçid üzrə əməkdaşlığı müzakirə edəcəklər.
Qeyd olunub ki, enerji dialoqunda Avropa İnvestisiya Bankı (AİB) və Avropa Yenidənqurma və İnkişaf Bankının (AYİB) nümayəndələri də iştirak edəcəklər.
